សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបែកក្បាលស្លាប់នៅអែបចិញ្ចើមផ្លូវគួរឲ្យអាណោចអាធ័ម បន្ទាប់ពីជិះកង់សុខៗត្រូវរថយន្តមិនចាំម៉ាកបុកពីក្រោយអូសជាច្រើនម៉ែត្រចំណែករថយន្តបង្កបើកគេចបាត់ស្រមោល ។ ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២ និង២០នាទីយប់រំលងអធ្រាត្រឈានចូលថ្ងៃព្រហស្បត្តិ៍ ទី២២ ខែ កក្កដា ឆ្នាំ២០២១ ស្ថិតតាមបណ្ដោយផ្លូវជាតិលេខ១ ចំណុចជិតវិទ្យាល័យច្បារអំពៅ ក្នុងសង្កាត់និរោធ ខណ្ឌច្បារអំពៅ ។
សពជនរងគ្រោះមិនទាន់ស្គាល់អត្តសញ្ញាណនៅឡើយ។
យោងតាមប្រភពពីសមត្ថកិច្ចបានឲ្យដឹងថា មុនពេលកើតហេតុគេឃើញបុរសម្នាក់ជិះកង់មួយគ្រឿងធ្វើដំណើរពីកើតទៅលិច ខណៈមកដល់ចំណុចកើតហេតុខាងលើស្រាប់តែមានរថយន្តមួយគ្រឿងមិនចាំម៉ាកធ្វើដំណើរស្របគ្នាមកពីក្រោយល្បឿនលឿនបានជ្រុលមកបុកពីក្រោយពេញទំហឹងអូសកង់និងបុរសរងគ្រោះខាងលើជាច្រើនម៉ែត្របណ្ដាលបែកក្បាលស្លាប់ក្នុងថ្លុកឈាម រីឯរថយន្តបានបន្តដំណើរទៅមុខគេចខ្លួនដោយសុវត្តិភាព ។
ក្រោយកើតហេតុ សមត្ថកិច្ចខណ្ឌច្បារអំពៅ ចុះមកដល់ចំណុចកើតហេតុ និងបានធ្វេីការវាស់វែងយកកង់ជនរងគ្រោះទៅរក្សាទុកនៅអធិការដ្ឋានខណ្ឌច្បារអំពៅ ដេីម្បីស្រាវជ្រាវរករថយន្តបង្កមកដោះស្រាយតាមច្បាប់ ។ ដោយឡែកសពជនរងគ្រោះសមត្ថកិច្ចបន្តស្រាវជ្រាវរកក្រុមគ្រួសារឲ្យមកទទួលសពយកទៅធ្វើបុណ្យតាមប្រពៃណី៕
ដោយ ៖ ភារ៉ា ដង្កោ
