សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ទីតាំងល្បែងស៉ីសងប្រភេទ ឡូតូkeno កំពុងរីករាយដូចផ្សិតបើកដំណើរការយ៉ាងរលូននៅក្នុងអគារបុរីកីឡា គឺអគារទី១ អគារទី៥ និងអគារទី៧ តាមបណ្ដោយផ្លូវលេខ២១១ ក្នុងសង្កាត់វាលវង់ ខណ្ឌ៧មករា ដោយពុំមានការចុះបង្ក្រាបពីសំណាក់អាជ្ញាធរខណ្ឌនោះទេ។ម្យ៉ាងទៀតទីតាំងបើកល្បែងស៊ីសងទាំងនេះមានការប្រមូលផ្ដុំមនុស្សជាច្រើន ដោយមិនចូលរួមអនុវត្តតាមវិធានការរបស់ក្រសួងសុខាភិបាល និងវិធានការ ៣កុំ ៣ការពារ របស់ប្រមុខរាជរដ្ឋាភិបាលឡើយ ដែលបច្ចុប្បន្នអាជ្ញាធរគ្រប់ជាន់ថ្នាក់កំពុងយកចិត្តទុកដាក់ចូលរួមបង្ការទប់ស្កាត់ការីករាលដាល និងដើម្បីកាត់ផ្ដាច់នូវជំងឺកូវីដ-១៩ក្នុងសហគមន៍២០កុម្ភៈឱ្យបានជោគជ័យ។ តែផ្ទុយទៅវិញ អាជ្ញាធរខណ្ឌ៧មករាដែលមានលោកលីម សុភា ប្រធានគណៈបញ្ជាការឯកភាពខណ្ឌ និងលោកវរសេនីយ៍ឯក នេត ស៉ីថុន អធិការនៃអធិការដ្ឋាននគរបាលខណ្ឌ៧មករា ហាក់មិនយកចិត្តទុកដាក់អនុវត្តបទបញ្ជារបស់ថ្នាក់ដឹកនាំឡើយពីបញ្ហាល្បែងសុីសងនេះ ដោយបានបើកដៃឱ្យឈ្មួញបើកលេងយ៉ាងរំភើយក្នុងមូលដ្ឋានរបស់ខ្លួន។
តាមប្រភពព័ត៌មានច្បាស់ការណ៍បានឱ្យដឹងថា ម្ចាស់ទីតាំងទាំងនេះមិនខ្លាចរអា និងគោរពវិធានការក្រសួងសុខាភិបាលឡើយ ដោយអះអាងថា មុនពេលបើកដំណើរការ គឺបានសុំការអនុញ្ញាតពីលោកអភិបាលខណ្ឌ លោកអធិការ លោកអធិការរងទទួលផែនព្រហ្មទណ្ឌខណ្ឌ៧មករានិងលោកនាយប៉ុស្តិ៍មូលដ្ឋានរួចរាល់ហើយតាមរយៈខ្សែបណ្ដោយ។
គួរបញ្ជាក់ផងដែរថា លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានជំរុញដល់លោកអធិការ នៃអធិការដ្ឋាននគរបាលខណ្ឌទាំង១៤ត្រូវយកចិត្តទុកដាក់និងប្រុងប្រយ័ត្នចំពោះបទល្មើសវិធានក្រសួងសុខាភិបាល ដែលបង្កឱ្យមានហានីភ័យរីករាលដាលជំងឺកូវីដ-១៩។ ក្នុងករណីដែលបណ្តែតបណ្តោយឱ្យមានការបើកក្លិបកម្សាន្ត ជួបជុំគ្នាផឹកស៊ី ច្រៀងរាំសប្បាយល្មើសនឹងវិធានការក្រសួងសុខាភិបាល គឺលោកអធិការនៃអធិការដ្ឋាននគរបាលខណ្ឌទាំង១៤ ត្រូវទទួលខុសត្រូវចំពោះមុខថ្នាក់លើ ហើយកុំឆ្លើយថាបទល្មើសកើតហើយថាមិនដឹងនោះ ។
ពាក់ព័ន្ធនឹងបញ្ហាល្បែងស៊ីសងខាងលើនេះខាងសារព័ត៌មាននគរដ្រេហ្គននៃកាសែតនគរវត្តមិនអាចធ្វើការសុំការបំភ្លឺនិងបកស្រាយបានទេពីលោកនាយប៉ុស្តិ៍នគរបាលសង្កាត់វាលវង់ដោយទូរស័ព្ទជាប់រវល់ ៕
ដោយ៖ ស សម
