សារព័ត៌មាន នគរវត្ត តែងតែនាំមុខគេជានិច្ច
វីរបុរសអ៊ុយក្រែន និងជាអតីតកីឡាករក្លិប AC Milan លោក AndriyShevchenko បានប្រកាសពីការបញ្ចប់ពេលវេលាដឹកនាំក្រុមជម្រើសជាតិអ៊ុយក្រែនហើយកាលពីថ្ងៃទី៣ សីហា។ នេះបើយោងតាមការចេញផ្សាយរបស់សារព័ត៌មាន MARCA។
បន្ទាប់ពីដឹកនាំអស់រយៈពេល៥ឆ្នាំក្នុងនាមជាគ្រូបង្វឹករបស់ប្រទេសអ៊ុយក្រែន លោក Shevchenko បានកំណត់ពេលវេលាក្នុងការកាន់តំណែងរបស់គាត់ដោយបានដឹកនាំពួកគេឱ្យទទួលបានជោគជ័យនៅព្រឹត្តិការណ៍យូរ៉ូ២០២០មុនពេលចាញ់អង់គ្លេសនៅរដូវក្តៅនេះ។
លោក Shevchenko បានសរសេរនៅលើ Instagram ថា “ខ្ញុំបានចំណាយពេល៥ឆ្នាំជាមួយក្រុមជម្រើសជាតិ។ ជាមួយនឹងការខិតខំប្រឹងប្រែងយើងបានបង្ហាញថាយើងមានសមត្ថភាពក្នុងការលេងបាល់ទាត់បែបទំនើប។ សូមអរគុណដល់អ្នកគាំទ្រទាំងអស់ចំពោះការគាំទ្រ និងការរិះគន់របស់អ្នក។ យើងបានបង្ហាញរួមគ្នាថាយើងអាចប្រកួតប្រជែងនិងគួរឱ្យរំភើប”។
សហព័ន្ធបាល់ទាត់អ៊ុយក្រែនមិនទាន់អាចបញ្ជាក់ពីការចាកចេញរបស់គ្រូបង្វឹករូបនេះនៅឡើយទេហើយក៏មិនបានធ្វើអត្ថាធិប្បាយអ្វីដែរ។បច្ចុប្បន្នអ៊ុយក្រែនឈរនៅលេខ២តាមពីក្រោយបារាំងក្នុងពូលរបស់ពួកគេសម្រាប់ការប្រកួតជម្រុះ World Cup ២០២២ នៅកាតា។
គួរបញ្ជាក់ថា លោក Shevchenko គឺជាអតីតកីឡាករស៊ុតបញ្ចូលទីច្រើនជាងគេនៅក្នុងប្រទេសរបស់គាត់ដោយបានស៊ុតបញ្ចូលទីបាន៤៨គ្រាប់សម្រាប់អ៊ុយក្រែនក្នុងអំឡុងពេលលេងរបស់គាត់។ គាត់ក៏ជាអ្នកឈ្នះពានរង្វាន់ Ballon d’Or ផងដែរដោយត្រូវបានគេដាក់ឈ្មោះថាជាកីឡាករល្អបំផុតរបស់ពិភពលោកនៅ AC Milan កាលពីឆ្នាំ២០០៤ ៕
ដោយ៖ ភារៈ(រូបភាព ៖ MARCA)
