មានករណីអគ្គិភ័យឆេះផ្ទះមួយកន្លែង កើតឡើងនៅផ្លូវបេ ផ្ទះលេខ៣១ ភូមិក្រាំងអង្រ្កង សង្កាត់ក្រាំងធ្នង់ ទាំងម៉ោង៦ព្រឹក !

ភ្នំពេញ៖ នៅវេលាម៉ោង ៦:០៥នាទីព្រឹក ថ្ងៃទី១២ ខែសីហា ឆ្នាំ២០២១ មានករណីអគ្គិភ័យឆេះផ្ទះមួយកន្លែង កើតឡើងនៅផ្លូវបេ ផ្ទះលេខ៣១ ភូមិក្រាំងអង្រ្កង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។ នេះបើយោងតាមការបញ្ជាក់ឲ្យដឹងពី ផេក ផ្លូវការរបស់ស្នងការដ្ឋាននគរបាលរាជធានីភ្នំពេញនៅព្រឹកថ្ងៃទី១២ ខែសីហា ឆ្នាំ២០២១ ។

ករណីអគ្គិភ័យនេះបណ្តាលមកពីឆ្លងចរន្តអគ្គិសនី មិនបណ្តាលឲ្យមានមនុស្សរងរបួស ឬស្លាប់ឡើយ គ្រាន់តែឆាបឆេះបណ្តាលឲ្យខូចខាតម៉ាស៊ីនឆុងកាហ្វេ ម៉ាស៊ីនវិចខ្ចប់កាហ្វេ ម៉ាស៊ីនកិនគ្រាប់កាហ្វេ ម៉ាស៊ីនក្រឡុកកាហ្វេ ធុងទឹកកក សម្ភារៈមួយចំនួន និងពុំបណ្ដាលឲ្យឆេះរាលដាលដល់ផ្ទះអ្នកជិតខាងឡើយ។

សូមបញ្ជាក់ថា, នៅវេលាម៉ោង៦:៣៥នាទីព្រឹក ថ្ងៃខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តពន្លត់អគិ្គភ័យរបស់ការិយាល័យអគ្គិភ័យ រាជធានីភ្នំពេញ ចំនួន០២គ្រឿង ប្រើប្រាស់ទឹកអស់ ០១ឡាន ស្មើនឹង ៤ម៉ែត្រគូប៕

ដោយ៖ សិលា