សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការបញ្ជាក់នៅក្នុងសន្និសីទកាសែតមួយរបស់ប៉ូលីសហុងកុង នៅថ្ងៃព្រហស្បតិ៍ទី១៩ ខែសីហា ឆ្នាំ២០២១នេះបាននិយាយថា កម្លាំងប៉ូលីសផ្នែកគ្រឿងញៀនទីក្រុងហុងកុង បានឃាត់ខ្លួនមនុស្ស និងរឹបអូសថ្នាំញៀនជាង២០០គីឡូក្រាម ដែលមានតម្លៃ ១៩៥លានដុល្លារហុងកុង(២៥លានដុល្លារអាមេរិក)។ ហើយនេះគឺជាផ្នែកនៃការស៊ើបអង្កេតរាប់ខែ និងជាការបង្រ្កាបបានថ្នាំញៀនច្រើនបំផុតប្រចាំឆ្នាំ។
នៅក្នុងសន្និសីទកាសែតដដែល បានបញ្ជាក់បន្ថែមថា ថ្នាំញៀនដែលប៉ូលីសបង្រ្កាបខាងលេីនេះរួមមាន៖ មេតំហ្វេតាមីនក្រាមចំនួន១៤៨គីឡូក្រាម និងហេរ៉ូអ៊ីន៨៦គីឡូក្រាម ត្រូវបានរកឃើញកាលពីថ្ងៃពុធទី១៨ ខែសីហាម្សិលមិញនេះ នៅក្នុងអាគារឧស្សាហកម្មមួយ។ ចំណែកជនសង្ស័យម្នាក់ ត្រូវបានសមត្ថកិច្ចចាប់ខ្លួននឹងត្រូវនាំឡើងតុលាការនៅថ្ងៃសុក្រទី២០ ខែសីហា ឆ្នាំ២០២១ស្អែកនេះផងដែរ។
បន្ថែមពីនេះ ប៉ូលីសហុងកុង ក៏បានបញ្ជាក់ដែរថា សម្រាប់ថ្នាំញៀនទាំងនេះ ក៏មានការជាប់ពាក់ព័ន្ធនឹងក្រុមហ៊ុនជួញដូរថ្នាំញៀនមួយដែលត្រូវបានស៊ើបអង្កេតអស់រាប់ខែ។ ហើយនៅខែឧសភា និងខែមិថុនាកន្លងទៅនេះ ចំពោះការស៊ើបអង្កេតនេះ បានឈានទៅដល់ការចាប់ខ្លួនបុរស៨នាក់ និងស្ត្រី៤នាក់ ដែលសង្ស័យថា ជាអ្នកផលិត និងជួញដូរថ្នាំញៀន ព្រមទាំងរារាំងរំខានដ៏ក្រុមប៉ូលីសក្នុងរង្វង់ប្រតិបត្តិការ៕
ដោយ៖ស តារា
