ហ៊ិន ចាន់នីរ័ត្ន និងសេង មង្គល មានភាពស្អិតល្មួតគ្នាខ្លាំងរហូតដល់គេសង្ស័យថាជាគូស្នេហ៍

ភ្នំពេញ៖ បុរសសង្ហា ស្រីស្អាត  និងជាអតីតម្ចាស់ជ័យលាភី Freshie Girls & Boy លោក សេង មង្គល និងកញ្ញា ហ៊ិន ចាន់នីរ័ត្ន បានបង្ហាញភាពស្និទ្ធស្នាលគ្នាយ៉ាងខ្លាំងរហូតធ្វើឲ្យអ្នកគាំទ្រសង្ស័យថាពួកគេបានបង្កាត់ភ្លើងស្នេហ៍រួមគ្នា។ អ្នកគាំទ្របានបង្ហាញពីការពេញចិត្តជាខ្លាំងប្រសិនបើការសង្ស័យនេះបានក្លាយជាការណ៍ពិតនោះ។ 

  ទស្សនិកជនបានសរសើរថា ពួកគេពិតជាស័ក្តិសមគ្នាណាស់ ប្រសិនបើអ្នកទាំងពីរបើកបេះដូងទទួលយកស្នេហាពីគ្នានោះ រហូតមានអ្នកគាំទ្របានលើកឡើងថា តារាសម្តែងទាំងពីរមិនមែនស័ក្តិសមតែនៅក្នុងខ្សែភាពយន្តនោះទេ គឺពួកគេពិតជាចង់ឃើញរូបភាពស្និទ្ធស្នាលរបស់អ្នកទាំងពីរឈានដល់ការស្វែងយល់ចិត្តគ្នាក្នុងន័យស្នេហានោះផង។ ការជំរុញនេះបានកើតមានសាជាថ្មីទៀតហើយក្រោយពីមួយរយៈចុងក្រោយនេះអ្នកទាំងពីរបានបង្ហាញភាពស្និទ្ធស្នាលគ្នាខ្លាំងរួមទាំងការធ្វើដំណើរទៅទីកន្លែងផ្សេងៗនិងការចេញមុខលើការងារសិល្បៈរួមគ្នាជាច្រើនបន្តបន្ទាប់។ កាន់តែចាប់ភ្លឹកថែមទៀតនោះគឺក្រោយពីព្រឹត្តិការណ៍ប្រកួតកម្មវិធី Freshie Girls & Boy ជំនាន់ទី២០កាលពីចុងខែសីហាកន្លងទៅនេះ លោក សេង មង្គលថែមទាំងបានលូកដៃកៀកស្មាប៉ះសាច់ហ៊ិន ចាន់នីរ័ត្ន គ្រាដែលនាងឡើងទទួលយកពានFreshie Cambodia Hall of Fame នៅលើឆាក ដែលការប៉ះសាច់នេះបានធ្វើឲ្យនាងអៀនជាខ្លាំងគ្រាដែលទស្សនិកជនស្រែកហ៊ោអបអរសាទរនោះ។ 

  អ្នកគាំទ្របានលើកឡើងថា បើទោះបីជាខុសជំនាន់គ្នាបន្តិចមែន ប៉ុន្តែពួកគេពិតជាស័ក្តិសមនឹងគ្នាខ្លាំងមែនទែន ដែលអាចចាត់ទុកថាជាដៃគូសម្តែងដ៏ស័ក្តិសម ហើយកន្លងទៅពួកគេធ្លាប់បានចូលរួមសម្តែងនៅក្នុងខ្សែភាពយន្តភាគរួមគ្នាជាបន្តបន្ទាប់របស់ស្ថានីយទូរទស្សន៍បាយ័នផងដែរដូចជារឿង ទាសីបេះដូង នោះជាដើម។ 

  គួរបញ្ជាក់ដែរថាតារាសម្តែង និងពិធីការិនី ហ៊ិន ចាន់នីរ័ត្ន គឺជាអតីតម្ចាស់ជ័យលាភីជំនាន់ទី៦ក្នុងអំឡុងឆ្នាំ ២០០៧ នាងបានសាងភាពលេចធ្លោទាំងលើការសម្តែង និងការងារជាពិធីការិនី ខណៈដែលលោកសេង មង្គលក៏ជាតារាសម្តែងដ៏ស្រស់សង្ហា និងជាពិធីករដ៏មានមន្តស្នេហ៍ផងដែរ៕ 

ដោយ ៖ វឌ្ឍនា