រដ្ឋាភិបាលជប៉ុន ៖ បានទទួលយកនូវសំណេីរបស់សម្តេចតេជោ ក្នុងការជំរុញគំរោងសាងសង់ហេដ្ឋារចនាសម្ព័ន្ធរូបវន្តនៃវិទ្យាបច្ចេកទេសខេត្តកំពង់ឆ្នាំង និងសារមន្ទីរសន្តិភាពសកម្មភាពមីននៅខេត្តសៀមរាប

ចែករំលែក៖

ភ្នំពេញ៖ មន្ត្រីស្ថានទូតជប៉ុនដឹកនាំដោយលោកស្រី Ms. FUJIMOTO Shoko, ជាលេខាទី១ស្ថានទូតជប៉ុន និង Mr. OKADA Naoya លេខាទី២ ព្រមទាំងតំណាងទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA)នៅកម្ពុជា តំណាងដោយលោកMr. SHINOHARA Yuji និងលោកMr. HAYASHI Akihito នៅថ្ងៃទី១៥ ខែកញ្ញា ឆ្នាំ២០២១នេះ បានអញ្ជេីញទៅទស្សនកិច្ចវាយតំលៃសកម្មភាពរបស់វិទ្យាស្ថានបច្ចេកទេសសកម្មភាពកំចាត់មីនរបស់អង្គភាពសុីម៉ាក់នៅខេត្តកំពង់ឆ្នាំង។ នេះបើតាមការបញ្ជាក់ពីហ្វេសប៊ុកផ្លូវការរបស់លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៉ីម៉ាក់) នៅយប់ថ្ងៃពុធទី១៥ ខែកញ្ញានេះ។

សូមអរគុណគណៈប្រតិភូជប៉ុន បេីទោះបីមានបញ្ហាជំងឺកូវីដ-១៩ក៏ដោយ ក៏នៅបន្តជួយគាំទ្រពេញទំហឹងដល់រាជរដ្ឋាភិបាលនិងប្រជាជនកម្ពុជា។ អង្គភាពសុីម៉ាក់មានមហិ្ឆតាពង្រឹងសមត្ថភាពវិទ្យាស្ថានបច្ចេកទេសសកម្មភាពកំចាត់មីននេះ ទាំងហេដ្ឋារចនាសម្ពន្ធ័រូបវន្តនិងធនធានមនុស្សដេីម្បីបន្តអនុវត្តភារកិច្ចបោសសំអាតគ្រាប់យុទ្ធភណ្ឌពីសង្គ្រាមនៅកម្ពុជាពីនេះដល់ឆ្នាំ២០២៥ និងបំរេីភារកិច្ចក្រោយឆ្នាំ២០២៥។

លេីសនេះទៀត អង្គភាពមានមោទនភាពដែលបន្តជួយគាំទ្រដល់កិច្ចសហការជាមួយប្រទេសក្នុងតំបន់និងក្នុងសាកលលោកដែលមានបញ្ហាសំណល់គ្រាប់យុទ្ធភណ្ឌក្រោយសង្គ្រាមដេីម្បីមករៀនសូត្រនៅកម្ពុជា។

រដ្ឋាភិបាលជប៉ុន បានទទួលយកនូវសំណេីរបស់សម្តេចតេជោប្រមុខរាជរដ្ឋាភិបាល ក្នុងការជំរុញគំរោងសាងសង់ហេដ្ឋារចនាសម្ពន្ធ័រូបវន្តនៃវិទ្យាបច្ចេកទេសនៅកំពង់ឆ្នាំងនេះនិងសារមន្ទីរសន្តិភាពសកម្មភាពមីននៅខេត្តសៀមរាប ដេីម្បីពង្រឹងសមត្ថភាពអង្គភាពសុីម៉ាក់លេីការហ្វឹកហ្វឺននៅកម្ពុជាផងនិងកិច្ចសហប្រតិបតិ្តការត្បូង-ត្បូងផងដែរ៕