សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្តហុីយ៉ាន់ដាយដឹកខ្សាច់មួយគ្រឿងមិនប្រយ័ត្នបានបួងចង្កូតបត់ស្តាំទៅកៀររថយន្តស៊េរីទំនេីបBMW ទៅគាបជាប់និងបង្គោលភ្លើងរងការខូចខាតយ៉ាងដំណំ កាលពីវេលាម៉ោង៧ និង៣០នាទីយប់ថ្ងៃទី១៥ ខែកញ្ញា ឆ្នាំ២០២១ នៅចំណុចមុខវត្តចាក់អង្រែក្រោម តាមបណ្តោយផ្លូវជាតិលេខ២ សង្កាត់ចាក់អង្រែលេី ខណ្ឌមានជ័យ រាជធានីភ្នំពេញ។
តាមប្រភពព័ត៌មានកន្លែងកើតហេតុបានប្រាប់ឲ្យដឹងថា មុនកើតហេតុឃើញរថយន្តដឹកខ្សាច់ម៉ាកហុីយ៉ាន់ដាយមួយគ្រឿង ក្បាលពណ៌ទឹកប្រាក់ពាក់ស្លាកលេខកំពង់ចាម3A-4555 ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងមកត្បូងក្នុងល្បឿនលឿនមធ្យម ខណៈមកដល់ចំណុចកេីតហេតុក៏បានបត់ស្តាំបម្រុងទៅផ្លូវ៦០ម៉ែត្រ ស្របពេលនោះក៏មានរថយន្តស៊េរីទំនើបមួយគ្រឿងម៉ាក BMW ពណ៌សពាក់ស្លាកលេខ ភ្នំពេញ2AG-8797 បើកបរដោយបុរសជនជាតិចិនស្របទិសគ្នាក៏ត្រូវរថយន្តដឹកដីកៀរទៅគាបជាប់និងបង្គោលភ្លើងរងការខូចខាតយ៉ាងដំណំ តែក្នុងករណីខាងលើនេះមិនមានអ្នកណាម្នាក់រងរបួសនោះឡើយ។
ក្រោយកើតហេតុ សមត្ថកិច្ចមូលដ្ឋានសហការជាមួយនឹងផ្នែកជំនាញចរាចរណ៍ខណ្ឌមានជ័យ បានចុះមកដល់ រួចឲ្យភាគីទាំងពីរធ្វើការចរចាគ្នា ដោយភាគីខាងរថយន្តដឹកខ្សាច់ព្រមសងថ្លៃមួយចំនួនទៅលេីភាគីរថយន្តBMW ដើម្បីបញ្ចប់រឿង៕
ដោយ ៖ ភារ៉ា ដង្កោ
