សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ សម្រាប់កុមារចាប់ពីអាយុ០៦ឆ្នាំដល់អាយុក្រោម១២ឆ្នាំនៅក្នុងខេត្តស្វាយរៀង នាព្រឹកថ្ងៃទី១៨ ខែកញ្ញា ឆ្នាំ២០២១នៅមន្ទីរពេទ្យបង្អែកខេត្តស្វាយរៀង។
លោក ម៉ែន វិបុល បានធ្វេីការអំពាវនាវដល់ ប្រជាពលរដ្ឋទាំងអស់ដែលមានអាយុចាប់ពី១៨ឆ្នាំឡេីងមិនទាន់ទទួលបានការចាក់វ៉ាក់សាំង សូមអញ្ជេីញទៅទទួលចាក់ ឱ្យបានគ្រប់ៗគ្នានៅទីតាំងដែលរដ្ឋបាលក្រុង-ស្រុកបានរៀបចំកន្លងមកនិងកំពុងដំណេីរការចាក់ជារៀងរាល់ថ្ងៃ។
ទន្ទឹមនេះលោកអភិបាលខេត្តស្វាយរៀង ក៏បានអំពាវនាវដល់ឪពុកម្តាយដែលនាំកូនមកទទួលការចាក់វ៉ាក់សាំងត្រូវមកតាមការកំណត់របស់អាជ្ញាធរ និងសូមជៀសវាងមកប្រជ្រៀតគ្នាធ្វើឱ្យបាត់បង់សណ្ដាប់ធ្នាប់ បាត់ការរក្សាគម្លាតសុវត្ថិភាពជាដើម ហេីយក្រោយទទួលបានការចាក់វ៉ាក់សាំងនេះរួច សូមបន្តប្រកាន់ភ្ជាប់នូវវិធានការ”៣ការពារ ៣កុំ” របស់ប្រមុខរាជរដ្ឋាភិបាលឲ្យបានខ្ជាប់ខ្ជួន។
សូមបញ្ជាក់ថា ចំពោះពេលវេលា និងទីតាំងមានដូចខាងក្រោម (ពេលព្រឹកពីម៉ោង៧:៣០នាទីដល់ម៉ោង១១:៣០នាទី ពេលរសៀលពីម៉ោង១រសៀល ដល់ម៉ោង៤រសៀល) ជារៀងរាល់ថ្ងៃរហូតដល់ថ្ងៃបញ្ចប់យុទ្ធនាការចាក់ជាស្ថាពររួមមាន៖
១-ក្រុងស្វាយរៀងៈ មន្ទីរពេទ្យបង្អែកខេត្តស្វាយរៀង។
២-ក្រុងបាវិត : មន្ទីរពេទ្យបង្អែកជីភូ
៣-ស្រុកកំពង់រោទ៍ : មណ្ឌលសុខភាពញ
៤-ស្រុកស្វាយទាប : មន្ទីរពេទ្យបង្អែកស្វាយទាប
៥- ស្រុករំដួល : មណ្ឌលសុខភាពថ្នាធ្នង់
៦- ស្រុកចន្ទ្រា : មណ្ឌលសុខភាព មេសថ្ងក
៧- ស្រុកស្វាយជ្រំ : មណ្ឌលសុខភាពតាសួស - មណ្ឌលសុខភាពអង្គតាសូ – មណ្ឌលសុខភាពមិត្តភាពកម្ពុជា-កូរ៉េ ឈេីទាល។
៨- ស្រុករមាសហែក: ទីតាំងអតីតសាលាស្រុករមាសហែក, មណ្ឌលសុខភាពអំពិល, មណ្ឌលសុខភាពអង្គប្រស្រែ៕
ដោយ៖យឹម សុថាន
