សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖លោក អុី សុខឃី អគ្គស្នងការរងនគរបាលជាតិ ទទួលផែនសន្តិសុខ បានមានប្រសាសន៍ថា វគ្គបំប៉នជំនាញជនបង្គោលស្តីពីការគ្រប់គ្រងសន្តិសុខឯកជននេះ ក្រុមការងារបានសិក្សា និងយោងតាមទិសដៅក៏ដូចជាផែនការសកម្មភាពរបស់នាយកដ្ឋានគ្រប់គ្រងសន្តិសុខឯកជន ឲ្យស្របតាមផែនការយុទ្ធសាស្រ្តរបស់អគ្គស្នងការនគរបាលជាតិ បានរៀបចំវគ្គបំប៉នជំនាញជនបង្គោល ស្តីពីការគ្រប់គ្រងសន្តិសុខឯកជនតាមប្រព័ន្ធអនឡាញ ដើម្បីពង្រឹងសមត្ថភាពជំនាញដល់មន្រ្តីគ្រប់គ្រងសន្តិសុខឯកជនឲ្យមានប្រសិទ្ធភាព ឲ្យមាននិរន្តភាពការងារ និងក៏ដូចជាបណ្តុះបណ្តាលជនបង្គោលបន្តវេន គ្រូបង្គោល សម្រាប់វគ្គបំប៉នជំនាញភ្នាក់ងារសន្តិសុខឯកជនទូទាំងប្រទេស។
លោក អុី សុខឃី អគ្គស្នងការរងនគរបាលជាតិ បានថ្លែងបែបនេះ នៅក្នុងពិធីបើកវគ្គបំប៉នជំនាញជនបង្គោល ស្តីពីការគ្រប់គ្រងសន្តិសុខឯកជន តាមប្រព័ន្ធវីដីអូអនឡាញ កាលពីព្រឹកថ្ងៃទី២០ ខែកញ្ញា ឆ្នាំ២០២១ ក្រោមអធិបតីភាពលោក ឧត្តមសេនីយ៍ឯក អុី សុខឃី អគ្គស្នងការរងនគរបាលជាតិ ទទួលផែនសន្តិសុខ តំណាងដ៏ខ្ពង់ខ្ពស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ដែលមានការអញ្ជើញចូលរួមដោយ លោល លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន និងលោក-លោកស្រីអនុប្រធាននាយកដ្ឋាន នាយ-នាយរងការិយាល័យជំនាញទាំងទាំង៦ ចំនុះនាយកដ្ឋានគ្រប់គ្រងសន្តិសុខឯកជន ព្រមទាំងនាយការិយាល័យគ្រប់គ្រងសន្តិសុខឯកជន រាជធានី-ខេត្ត ទាំងអស់ ។
អគ្គស្នងការរងនគរបាលជាតិ បានមានប្រសាសន៍ថា ការបើកវគ្គបំប៉នជំនាញជនបង្គោល ស្តីពីការគ្រប់គ្រងសន្តិសុខឯកជន តាមប្រព័ន្ធវីដីអូអនឡាញ គឺបានរៀបចំប្រព័ន្ធ Hot Line និងកម្លាំងអន្តរាគមន៍២៤/២៤ ចំនួន៤៥នាក់ និងចុះដកពិសោធន៍ប្រព័ន្ធសន្តិសុខសុវត្ថិភាពតាមបណ្តាក្រុមហ៊ុនផ្តល់សេវាសន្តិសុខឯកជន១១២ក្រុមហ៊ុន និងបានចាប់ផ្តើមកសាងច្បាប់ស្តីពីការគ្រប់គ្រងសន្តិសុខឯកជន ណែនាំឲ្យក្រុមហ៊ុន និងគ្រឹះស្ថានចូលរួមទប់ស្កាត់ជំងឺកូវីដ-១៩ គោលដៅ។
លោក អុី សុខឃី បន្តទៀតថា ដោយមើលឃើញថា ក្នុងយុគសម័យជំងឺកូវីដ-១៩ ធ្វើឲ្យយើងទាំងអស់គ្នារួមគ្នាទប់ស្កាត់នឹងអនុវត្តតាមវិធានការសុខាភិបាល ក៏ដូចជាវិធានការរបស់រាជរដ្ឋាភិបាល ហេតុនេះនាយកដ្ឋានគ្រប់គ្រងសន្តិសុខឯកជនបានផ្តួចផ្តើមរៀបចំវគ្គបំប៉នជំនាញជនបង្គោលនេះតាមប្រព័ន្ធអនឡាញ៕
ដោយ៖ ជ្រោយពេជ្រ
