សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ លោក ប៉ែន កុសល្យអភិបាល នៃគណៈអភិបាលខេត្តឧត្ដរមានជ័យ បានអញ្ជើញចុះសួរសុខទុក្ខ និងនាំយកអំណោយទៅចែកជូនបងប្អូនប្រជាពលរដ្ឋ និងប្រជាការពារប្រមាណ៦៥គ្រួសារដែលស្ថិតក្នុងតំបន់បិទខ្ទប់ ក្នុងភូមិសាស្ត្រភូមិអូរស្មាច់ សង្កាត់អូរស្មាច់ ក្រុងសំរោង កាលពីថ្ងៃចន្ទទី២០ ខែកញ្ញា ឆ្នាំ២០២១។
ក្នុងឱកាសជួបសួរសុខទុក្ខនោះដែរ លោកអភិបាលខេត្តបានដាក់បទបញ្ជាឱ្យលោកស្នងការនគរបាលខេត្ត និងលោកមេបញ្ជាការកងរាជអាវុធហត្ថខេត្តត្រូវតាមចាប់ឱ្យបាននូវក្រុមដែលជួបជុំគ្នាលេងល្បែងស៊ីសងបណ្ដាលឲ្យមានការរីករាលដាលជំងឺកូវីដ-១៩ នៅក្នុងសហគមន៍។
បន្ថែមពីនេះ លោកអភិបាលខេត្តក៏បានជំរុញឱ្យប្រជាពលរដ្ឋគ្រប់រូបចងចាំ និងចូលរួមអនុវត្តឲ្យបានខ្ជាប់ខ្លួនជានិច្ចនូវវិធានការការពារខ្លួនសាមញ្ញៗ និងត្រូវបន្ដប្រុងប្រយ័ត្នផ្ទាល់ខ្លួនពីការឆ្លងជំងឺកូវីដ-១៩ ដោយអនុវត្តឱ្យខាងតែបាននូវវិធានការ «បីកុំ និង បីការពារ» ដើម្បីចូលរួមទប់ស្កាត់នូវការចម្លងជំងឺកូវីដ-១៩ ឱ្យកាន់តែមានប្រសិទ្ធភាព។
សូមបញ្ជាក់ថា៖ ក្នុងអំណោយដែលនាំយកមកចែកជូនពលរដ្ឋនាពេលនេះមានដូចជា៖ អង្ករ ,មី ,ត្រីខ ,ទឹកត្រី ,ទឹកស៊ីអុីវ និងថវិកាមួយចំនួនផងដែរ៕
ដោយ៖សហការី
