សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាជនជាតិបរទេសម្នាក់បានផ្ទុះអាវុធ បណ្តាលឲ្យរងរបួសខ្លួនឯងមួយគ្រាប់ត្រូវចំកំភួនជើងខាងស្តាំ ដែលហេតុការណ៍នេះ បង្កឱ្យមានការភ្ញាក់ផ្អើលឡើង កាលពីវេលាម៉ោង៣ទៀបភ្លឺថ្ងៃទី២៦ ខែកញ្ញា ឆ្នាំ២០២១ ទីតាំងកើតហេតុខាងលើនេះ ស្ថិតនៅចំណុចទល់មុខ H&Y តាមបណ្តោយផ្លូវ១៥៤ ចំណុចផ្សារសូរិយាម៉ល ក្នុងសង្កាត់ផ្សារថ្មី៣ ខណ្ឌដូនពេញ ហើយត្រូវបានសមត្ថកិច្ច ទាក់ទងហៅរថយន្តមកដឹកបុរសរូបនេះយកទៅព្យាបាលនៅមន្ទីរពេទ្យកាល់ម៉ែត។
បើតាមសម្តីកម្លាំងកងរាជអាវុធហត្ថ បានឲ្យដឹងថា បុរសដែលបាញ់ខ្លួនឯងនោះមានឈ្មោះ ភែ រី (perry) អាយុ៤៦ឆ្នាំ ជាជនជាតិបរទេស ធ្វើការផ្នែកធនធានមនុស្ស ស្នាក់នៅម្តុំផ្សារដើមគ ខណ្ឌទួលគោក ។
បើតាមសម្ដីរបស់បុរសដែលបាញ់ខ្លួនឯងបានឲ្យដឹងថា មុនពេលកើតហេតុ គឺរូបគាត់បានជួបជុំមិត្តផឹកស៊ីនៅផ្សារសូរិយាម៉ល លុះដល់ម៉ោង២និង៥០នាទីរំលងអធ្រាត្រ រូបគាត់ក៏បានចេញពីជួបជុំមិត្ត រួចដើរកាត់ផ្លូវ១៥៤ ក៏ស្រាប់តែប្រទះឃើញកាំភ្លើងខ្លី ពណ៌ខ្មៅលាយទឹកប្រាក់ ម៉ាកស៊ុយរ៉ាគី មួយដើម គាត់ក៏បានយកមកដាក់ចូលហោប៉ៅខាងក្រោយខាងស្តាំ ស្រាប់តែកាំភ្លើងនោះរៀលកៃផ្ទុះត្រូវកំភួនជើងខ្លួនឯង បណ្តាលឱ្យរងរបួសធ្ងន់តែម្តង។
បើតាមសម្តីប្រជាពលរដ្ឋដែលបានឃើញហេតុការណ៍នេះ បានឲ្យដឹងថា មុនពេលកើតហេតុ គេបានឃើញបុរសរូបនេះមានកាបូបស្ពាយនៅនឹងខ្នង និងមានកាំភ្លើងមួយដើម បាញ់ឡើងទៅលើមេឃ១គ្រាប់ រួចទុកកាំភ្លើងក្នុងហោប៉ៅវិញ លុះមួយសន្ទុះក្រោយមក កម្លាំងកងរាជអាវុធហត្ថខណ្ឌដូនពេញ បានចុះទៅដល់ទីតាំងកើតហេតុ ជនជនជាតិបរទេសរូបនេះ ក៏បានលូកដៃចូលហោប៉ៅដែលមានកាំភ្លើងនោះ ស្រាប់តែច្រឡំដៃប៉ះកៃបាញ់បែកកំភួនជើងខ្លួនឯងតែម្តង។
បន្ទាប់ពីកើតហេតុសមត្ថកិច្ចបានចុះមកដល់ រួចទាក់ទងទៅខាងមន្ទីរពេទ្យកាល់ម៉ែត ហៅរថយន្តសាមុយមកដឹកបុរសជនបរទេសរូបនេះ យកទៅសង្គ្រោះបន្ទាន់ជាមុនសិន រីឯកាំភ្លើងត្រូវបានកម្លាំងអាវុធហត្ថ ដកហូតយកទៅរក្សាទុក ដើម្បីស្រាវជ្រាវនៅពេលក្រោយ៕
ដោយ៖ ជ្រោយពេជ្រ
