សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អ្នកជំនួញជនជាតិកូសូវ៉ូម្នាក់ លោក COKOVIC DENIS បន្ទាប់ពីបានទទួលយុត្តិធម៌ឡើងវិញ ក្រោយពីរងភាពអយុត្តិធម៌អស់រយៈពេល ៤ឆ្នាំកន្លងមក ហេីយនៅក្នុងសន្និសីទសារព័ត៌មានមួយ កាលពីរសៀលថ្ងៃសុក្រទី០១ ខែតុលា ឆ្នាំ២០២១ បានសម្តែងការដឹងគុណចំពោះព្រះករុណាព្រះបាទសម្តេចព្រះនរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា ,សម្តេចតេជោ ហ៊ុន សែន នាយករដ្ឋមន្រ្តីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចំពោះភាពជាអ្នកដឹកនាំដែលបានផ្តល់នូវសន្តិភាពនិងវិបុលភាព ដល់ព្រះរាជាណាចក្រកម្ពុជា និងប្រជាជនទាំងអស់នៅកម្ពុជា។ ជាមួយគ្នានេះ អ្នកជំនួញជនជាតិកូសូវ៉ូរូបនេះ ក៏សូមថ្លែងអំណរគុណចំពោះតុលាការគ្រប់កម្រិតនៅប្រទេសកម្ពុជា ជាពិសេសតុលាការកំពូលដែលបានជួយឱ្យគាត់ក្នុងការស្វែងរកយុត្តិធម៌។ មិនតែប៉ុណ្ណោះ លោក COKOVIC DENIS បានសង្កត់ធ្ងន់ថា៖ “សូមអរគុណសន្តិភាព!” ប្រសិនបើមានឱកាសរូបគាត់ផ្ទាល់ចង់ជួបសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដើម្បីបង្ហាញពីការដឹងគុណនិងបង្ហាញពីការប្តេជ្ញាចិត្តពិតប្រាកដក្នុងការវិនិយោគនៅកម្ពុជា។
សូមជម្រាបថា កាលពីថ្ងៃទី២៦ ខែតុលា ឆ្នាំ២០១៧កន្លងទៅ លោក COKOVIC DENIS, ឈ្មោះ SIRILUCK CHOOCHAR និងឈ្មោះ SOMPONG SAKULTHAP ត្រូវបានដើមបណ្ដឹងរដ្ឋប្បវេណី បានដាក់ពាក្យបណ្ដឹងមកកាន់សាលាដំបូងរាជធានីភ្នំពេញ ពីបទល្មើសមិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត ព្រមទាំងបទល្មើសឆបោក។ បន្ទាប់មកសាលាដំបូងរាជធានីភ្នំពេញ បានសម្រេចតាមសាលក្រមព្រហ្មទណ្ឌលេខ ៨៩២ត ចុះថ្ងៃទី២៦ ខែមីនា ឆ្នាំ២០១៩ ឱ្យជនជាប់ចោទទាំងបីនាក់រួចផុតពីបទចោទមិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត ហើយជនជាប់ចោទទាំងបីនាក់ត្រូវបានតុលាការចោទប្រកាន់ពីបទឆបោក ដោយផ្តន្ទាទោសម្នាក់ៗរយៈពេល២ឆ្នាំ។
ប៉ុន្តែដោយជនជាប់ចោទទាំងបីនាក់មិនសុខចិត្ត ក៏ប្តឹងឧទ្ធរណ៍ បន្ទាប់មកសាលាឧទ្ធរណ៍ក៏បានសម្រេចតាមសាលដីកាលេខ ៤១ ក្រIIប ចុះថ្ងៃទី២៤ ខែឧសភា ឆ្នាំ២០១៩ ដោយតម្កល់សាលក្រមរបស់សាលាដំបូងរាជធានីភ្នំពេញទុកជាបានការ លើកលែងតែចំណុចផ្តន្ទាទោសរយៈពេល២ឆ្នាំលើឈ្មោះ COKOVIC DENIS មកដាក់ផ្តន្ទាគាររយៈពេល១ឆ្នាំ១០ខែ វិញ។ ជនជាប់ចោទទាំងបីនាក់នូវតែមិនសុខចិត្ត ក៏បន្តប្តឹងសាទុក្ខមកតុលាការកំពូល ហើយត្រូវបានតុលាការកំពូលសម្រេចតាមអំណាចសាលដីកាព្រហ្មទណ្ឌលេខ ២៣៣ IV ចុះថ្ងៃទី២៧ ខែកក្កដា ឆ្នាំ២០២០ ឱ្យជនជាប់ចោទទាំងបីនាក់រួចផុតពីបទឆបោក។
ដោយឡែកចំពោះករណីមួយទៀត ដើមបណ្តឹងរដ្ឋប្បវេណី ក៏បានប្តឹងឈ្មោះ COKOVIC DENIS, ឈ្មោះ SIRILUCK CHOOCHAR និងឈ្មោះ SOMPONG SAKULTHAP ម្តងទៀតពីបទមិនបំពេញកាតព្វកិច្ចចំពោះឧបករណ៍អាចជួញដូរបាន និងសមគំនិត។ បន្ទាប់មកសាលាដំបូងរាជធានី បានសម្រេចតាមអំណាចសាលក្រមព្រហ្មទណ្ឌលេខ ១៦១៤ហ ចុះថ្ងៃទី១១ ខែមិថុនា ឆ្នាំ២០១៩ ឱ្យជនជាប់ចោទទាំងបីនាក់ខាងលើ រួចខ្លួនពីបទចោទខាងលើដែរ។ ដើមបណ្តឹងមិនសុខចិត្តនឹងសាលក្រមនេះ ក៏ប្តឹងឧទ្ធរណ៍ ហើយសាលាឧទ្ធរណ៍ក៏បានសម្រេចតាមសាលដីកាព្រហ្មទណ្ឌលេខ ១៥៩ ក្រIIរ ចុះថ្ងៃទី២៣ ខែវិច្ឆិកា ឆ្នាំ២០២០ ដោយច្រានចោលនូវបណ្តឹងឧទ្ធរណ៍របស់ដើមបណ្តឹងរដ្ឋប្បវេណី។
ដោយដើមបណ្តឹងរដ្ឋប្បវេណី នូវតែមិនសុខចិត្តពីសាលដីកានេះ ក៏ធ្វើបណ្តឹងសាទុក្ខទៅតុលាការកំពូលទៀត ហើយតុលាការកំពូលក៏បានជំនុំជម្រះនៅថ្ងៃទី២៧ ខែកញ្ញា ឆ្នាំ២០២១ និងប្រកាសជាសាធារណៈនៅថ្ងៃទី៣០ ខែកញ្ញា ឆ្នាំ២០២១ តាមសាលដីកាព្រហ្មទណ្ឌលេខ ៣៣៧ VI ចុះថ្ងៃទី៣០ ខែកញ្ញា ឆ្នាំ២០២១ ដោយបដិសេធបណ្តឹងសាទុក្ខរបស់ដើមបណ្តឹង និងសម្រេចតម្កល់សាលដីការបស់សាលាឧទ្ធរណ៍ទុកជាបានការ។
បេីតាមការបញ្ជាក់ពីលោក Denis Cokovic បានឱ្យដឹងថា ព្រះរាជាណាចក្រកម្ពុជា មានគុណតម្លៃស្នូលនៃប្រព័ន្ធយុត្តិធម៌ផ្ទាល់ខ្លួនមានភាពយុត្តិធម៌ និងមានតុល្យភាពដើម្បីបម្រើនិងការពារខ្ញុំ និងអាជីវកម្មរបស់ខ្ញុំ -នីតិរដ្ឋមានកំរិតខ្ពស់ -សិទ្ធិមនុស្សត្រូវបានការពារជាអតិបរមា -ស្ថាប័នត្រូវបានរៀបចំឡើងហើយនៅកម្រិតខ្ពស់ខ្ញុំមិនអាចសុំអ្វីប្រសើរជាងនេះបានទេ។ ព្រះរាជាណាចក្រកម្ពុជា និងរាជរដ្ឋាភិបាលបច្ចុប្បន្នក្រោមការដឹកនាំរបស់សម្ដេចតេជោ ហ៊ុន សែន កំពុងអភិវឌ្ឈន៏ប្រទេសកម្ពុជាឱ្យរីកចម្រើននិងការពារវិនិយោគិនបរទេសទាំងអស់ដែលចាប់អារម្មណ៍មកវិនិយោគនៅកម្ពុជា។
អ្នកជំនួញរូបនេះ បានឱ្យដឹងទៀតថា សម្រាប់វិនិយោគិនដូចខ្ញុំផ្ទាល់ខ្ញុំបានឃើញឱកាសជាច្រើនសម្រាប់ប្រជាជនមកពីគ្រប់ស្រទាប់វណ្ណៈក្នុងការបង្កើនជំនាញនិងជំនាញរបស់ពួកគេដើម្បីជួយលើកកម្ពស់រដ្ឋាភិបាលក្នុងការអភិវឌ្ឈន៏ ប្រទេសកម្ពុជានិងប្រកួតប្រជែងក្នុងទីផ្សារពិភពលោក។
ប្រទេសកម្ពុជា គឺជាប្រទេសដែលមានកម្លាំងពលកម្មក្មេងជាងគេបំផុតនៅលើពិភពលោក កម្មករវ័យក្មេងមួយចំនួនធំមានជំនាញគ្រប់វិស័យបច្ចុប្បន្ននេះសម្តេចនាយករដ្ឋមន្រ្តីហ៊ុនសែនបានជំរុញយ៉ាងខ្លាំងក្លាដល់ការអប់រំខ្ពស់ដើម្បីបង្កើនធនធានមនុស្សដើម្បីបំពេញតម្រូវការកម្លាំងការងារនៅសតវត្សរ៍ទី២១ រួមទាំងការគាំទ្រយ៉ាងខ្លាំងដល់វិស័យកសិកម្ម ។
លោក CokovicDenis បានបន្ថែមថា ខ្ញុំនឹងអញ្ចើញអ្នកវិនិយោគផ្សេងៗ មកវិនិយោគនៅកម្ពុជាលើគ្រប់វិស័យទាំងអស់ ព្រោះប្រទេសកម្ពុជាមានសក្តានុពលធំធេង ហើយគំនិតរបស់ខ្ញុំចំពោះការវិនិយោគមួយដុល្លារអាចរកបានមួយពាន់ យើងមានរដ្ឋាភិបាលដ៏ល្អ ហើយមានធនធានធម្មជាតិជាច្រើន មានមនុស្សដែលមានជំនាញផ្សេងៗ មានការលើកទឹកចិត្តតាមរយៈពន្ធ និងច្បាប់វិនិយោគបរទេសសាមញ្ញ។
ដោយឡែកនៅពេលដែលលោកជាប់ពន្ធនាគារនោះ លោក CokovicDenis ក៏បានគូសបញ្ជាក់ថា៖ “ខ្ញុំគ្មានបញ្ហាទេសិទ្ធិមនុស្ស ត្រូវបានការពារក្នុងកម្រិតខ្ពស់បំផុតសម្រាប់អ្នកទោសទាំងអស់ជាពិសេសចំពោះជនបរទេសជនបរទេសត្រូវបានការពារជាអតិបរមាពីរដ្ឋបាលពន្ធនាគារនិងពីមន្រ្តីពន្ធនាគារគ្រប់រូប។ ខ្ញុំសូមឆ្លៀតឱកាសនេះផ្ញើការគោរពនិងសូមអរគុណចំពោះការគោរពដ៏ត្រឹមត្រូវចំពោះការគ្រប់គ្រងពន្ធនាគារទាំងមូលនិងមន្រ្តីពន្ធនាគារទាំងអស់”៕ដោយ៖ស តារា
រូបភាព៖ លោក COKOVIC DENIS ធ្វើសន្និសីទសារព័ត៌មានមួយ កាលពីរសៀលថ្ងៃសុក្រទី០១ ខែតុលា ឆ្នាំ២០២១ម្សិលមិញនេះ
