សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ពិតជានឹកស្មានមិនដល់ក្មេងប្រុសម្នាក់ហូបមីឈ្លក់ធ្វើឲ្យបាត់បង់ជីវិត បន្ទាប់ពីបញ្ជូនទៅមន្ទីរពេទ្យ នៅវេលាម៉ោង០៣និង២០នាទីរសៀលថ្ងៃទី០២ខែតុលា ឆ្នាំ ២០២១ នៅភូមិថ្មី ឃុំសំរោង ស្រុកអូរជ្រៅ ។
ក្មេងរងគ្រោះឈ្មោះ ទុន ស៊ីម៉ានុត ភេទប្រុសអាយុ០៦ឆ្នាំ នៅភូមិថ្មី ឃុំសំរោង ស្រុកអូរជ្រៅ ជាក្មេងពិការភាពតាំងពីកំណើត(ទន់ដៃ ជើង )ដើរមិនរួច ។ នៅមុនពេលកើតហេតុ មានបងស្រីបានឆុងមីថៃម៉ាកយ៉ាំៗ ចំនួន០៣កញ្ចប់ ឲ្យប្អូនៗចំនួន០៣នាក់ ចែកគ្នាម្នាក់០១ចានទាំងក្មេងរងគ្រោះ ។នៅពេលដែលកំពុងហូបស្រាប់តែក្មេងរងគ្រោះបានឈ្លក់មី មានអាការៈទន់.ក ដោយឃើញដូច្នោះ បងស្រីបានជួយរឹតនិងនាំទៅមណ្ឌលសុខភាព ពេលទៅដល់មណ្ឌលសុខភាពគ្រូពេទ្យពិនិត្យនិងប្រាប់ថាកុមារារងគ្រោះបានដាច់ខ្យល់ស្លាប់បាត់ទៅហើយ។
នគរបាលបញ្ជាក់ថា តាមការពិនិត្យរបស់គ្រូពេទ្យឃើញមានសរសៃមីចូលក្នុងរន្ធច្រមុះ សង្ស័យពេលក្មេងប្រុសហូបមីឈ្លក់ចូលក្នុងផ្លូវដង្ហើមបណ្តាលស្ទះផ្លូវដង្ហើមស្លាប់ ម្យ៉ាងទៀតក្មេងរងគ្រោះ ជាមនុស្សពិការដើរមិនរួចនៅតែមួយកន្លែង ។
សពត្រូវបានក្រុមគ្រួសារយកទៅចាត់ចែងធ្វើបុណ្យ តាមប្រពៃណី ។
ដើម្បីជាការចូលរួមរំលែកទុក្ខជាមួយក្រុមគ្រួសារសព នៅព្រឹកថ្ងៃទី០៣ខែតុលា ឆ្នាំ២០២១នេះ លោក ជា សេងអាន ក្រុមការងារខេត្ត ចុះជួយឃុំសំរោង និងលោក ឃុត នេត ក្រុមប្រឹក្សាស្រុកអូរជ្រៅ បាននាំយកគ្រឿងឧបភោគ បរិភោគ មាន៖អង្ករ២០គីឡូក្រាម,មី០១កេស,ទឹកត្រី០១យួរ,ទឹកស៊ីអុីវ០១យួរ,ត្រីខ០១យួរនិងថវិកាចំនួន១៥០,០០០រៀល(១៥ម៉ឺនរៀល)ឧបត្ថម្ភក្នុងកម្មវិធីបុណ្យផងដែរ៕
ដោយ ៖ វណ្ណា
