សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដោយមានការណែនាំពីលោក គួច ចំរើន អភិបាល នៃគណៈអភិបាលខេត្តព្រះសីហនុ នៅថ្ងៃសៅរ៍ ៣កើត ខែអស្សុជ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី០៩ ខែតុលា ឆ្នាំ២០២១នេះ បានបញ្ជាឱ្យកម្លាំងអន្តរាគមន៍ពិសេសរបស់ស្នងការដ្ឋាននគរបាលខេត្តព្រះសីហនុចេញល្បាតតាមឆ្នេរអូរឈើទាល និងឆ្នេរអូរត្រេះ ដើម្បីរក្សាសុវត្ថិភាព និងសន្តិសុខជូនប្រជាពលរដ្ឋ ភ្ញៀវជាតិ និងអន្តរជាតិ មកលេងកម្សាន្តក្នុងខេត្តព្រះសីហនុ ។
ក្នុងឱកាសនោះលោកស្នងការ ក៏បានលើកឡើងថា បញ្ហាចំពោះមុខដែលយើងកំពុងប្រឈមនោះ គឺជំងឺកូវីដ-១៩ ដែលនៅតែបន្តឆក់យកអាយុជីវិតប្រជាពលរដ្ឋយើងជាបន្តបន្ទាប់ ដូច្នេះសុំឱ្យមានការរួមគ្នា ដើម្បីប្រយុទ្ធប្រឆាំងនឹងជំងឺកូវីដ-១៩ ដោយយើងត្រូវរស់នៅតាមបែបគន្លងថ្មី ពាក់ម៉ាស់ រក្សាគម្លាតសុវត្ថិភាព កាត់បន្ថយការជួបជុំ ការលាងសម្អាតដៃជាមួយអាល់កុល, ជែល ,សាប៊ូ ពិតជាមានការចាំបាច់សម្រាប់យើងទាំងអស់គ្នា។
បន្ថែមពីនេះ លោកឧត្ដមសេនីយ៍ទោ ជួន ណារិន្ទ ក៏បានអំពាវនាវឱ្យបងប្អូនអនុវត្តតាមវិធានសុខាភិបាលឱ្យបានម៉ត់ចត់ និងបន្តចូលរួមជាមួយវិធានការ «៣ការពារ ៣កុំ»ឱ្យបានទាំងអស់គ្នា៕
ដោយ៖សហការី
