សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តកាមរីហាយប្រ៊ីត បានកៀរជាមួយរថយន្តហាយឡេនឌ័រ បណ្ដាលឲ្យខូចខាតតិចតួចតែប៉ុណ្ណោះតែភាគីទាំងសងខាងជជែកយកតែត្រូវរៀងៗខ្លួនបង្កឲ្យមានការកកស្ទះចរាចរណ៍ដល់អ្នកដំណេីរជាខ្លាំង កាលពីវេលាម៉ោង៧ និង១០នាទីយប់ ថ្ងៃទី១១ ខែតុលាឆ្នាំ២០២១ នៅចំណុចលេីស្ពានស្ទឹងមានជ័យ តាមបណ្ដោយផ្លូវព្រះមុន្នីរ៉េត ក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា ក្នុងករណីគ្រោះថ្នាក់ចរាចរណ៍នេះគឺ រថយន្តមួយគ្រឿងម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2AJ-2070 បានធ្វេីដំណេីរតាមបណ្ដោយផ្លូវព្រះមុន្នីរ៉េត ទិសដៅពីកេីតទៅលិច ស្របទិសគ្នាជាមួយរថយន្តម៉ាក កាមរីហាយប្រ៊ីត ពណ៌ស ពាក់ស្លាកលេខភ្នំពេញ 2BI-5075 ហេីយក៏បានកៀរគ្នាខូចខាតបន្តិចបន្តួចតែប៉ុណ្ណោះ រួចភាគីទាំង២ក៏ឈប់រថយន្តចំកណ្ដាលផ្លូវចុះមកនិយាយគ្នាទាំងមិនទទួលខុសរៀងៗខ្លួន បង្កឲ្យមានការកកស្ទះចរាចរណ៍ដល់បងប្អូនប្រជាពលរដ្ឋកំពុងធ្វេីដំណេីរឆ្លងកាត់ជាខ្លាំង ។
ក្រោយមកសមត្ថកិច្ចមូលដ្ឋានបានចុះមកសម្រួលចរាចរណ៍និងសម្របសម្រួលភាគីទាំង២មួយសន្ទុះធំ ទេីបពួកគាត់សម្រេចបេីករថយន្តមកអែបខាង ហេីយក៏ត្រូវរ៉ូវគ្នាដោយមិនមានខាងណា សងខាងណានោះទេ ៕
ដោយ ៖ ភារ៉ា ដង្កោ
