សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅទីស្នាក់ការកណ្តាល នាថ្ងៃអង្គារ ទី ១២ ខែតុលា ឆ្នាំ២០២១នេះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់អំណោយជួយសម្រាលការលំបាកដល់ លោក ច័ន្ទ សុភាន (ហៅ ច័ន្ទ ម៉ៅ) អាយុ ៣៩ឆ្នាំ ជាកម្មករសំណង់ ដែលត្រូវវះកាត់ព្យាបាលជើងខាងស្តាំ ដោយសាររងរបួសមុតដែកគោលហើយមិនបានព្យាបាលត្រឹមត្រូវតាមគ្រូពេទ្យជំនាញ (អ្នកជំងឺព្យាបាលតាមបែបគ្រូខ្មែរ) មានទីលំនៅភូមិច្រករំដេង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។
ក្នុងឱកាសនោះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងសូមឱ្យអ្នកជំងឺត្រូវអនុវត្តតាមការណែនាំរបស់គ្រូពេទ្យ ទើបឆាប់បានជាសះស្បើយ។ ជាមួយគ្នានេះ លោកស្រី បានផ្តាំផ្ញើលើកទឹកចិត្តដល់អ្នកជំងឺ បន្ទាប់ពីជាបានសះស្បើយហើយនោះ ត្រូវខិតខំតស៊ូប្រឹងប្រែងប្រកបមុខរបរណាដែលអាចធ្វើបានទៅតាមលទ្ធភាពរបស់ខ្លួន ដើម្បីជីវិតរស់នៅបន្តទៅមុខទៀត។
ប្អូនស្រីបង្កើតរបស់ លោក ច័ន្ទ សុភាន ដែលមកទទួលអំណោយនាពេលនេះ បានថ្លែងអំណរគុណយ៉ាងជ្រាលជ្រៅបំផុតចំពោះ កាកបាទក្រហមកម្ពុជា ដែលបានជួយសម្រាលការលំបាកជូនប្រជាពលរដ្ឋក្រីក្រ រងគ្រោះ និងងាយរងគ្រោះបំផុត ដោយមិនប្រកាន់ពូជសាសន៍ វណ្ណៈ ពណ៌សម្បុរ ឬនិន្នាការនយោបាយអ្វីឡើយ។
សូមបញ្ជាក់ថា អំណោយផ្តល់ជូនរួមមាន៖ គ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួន៕
ដោយ ៖ សិលា
