សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ សមត្ថកិច្ចបញ្ជូនខ្លួន ជនសង្ស័យជាចោរលួចទូកម៉ាស៊ីនកាលពីខែសីហាកន្លងមកទៅសាលាដំបូងខេត្តអនុវត្តទោសតាមផ្លូវច្បាប់។
សមត្ថកិច្ចបានឲ្យដឹងថាជនសង្ស័យ ត្រូវបានចាប់ខ្លួននៅថ្ងៃទី១៣ ខែតុលា ក្រោមការដឹកនាំបញ្ជាពីលោកឧត្តមសេនីយ៍ទោ ព្រុំ សន្ធរ ស្នងការនគរបាលខេត្តព្រៃវែង និងមានការចង្អុលបង្ហាញពីលោកឧត្តមសេនីយ៍ត្រី ពៅ ជីវី ស្នងការរងទទួលផែនព្រហ្មទណ្ឌឱ្យធ្វើការស្រាវជ្រាវវែកមុខចោរលួចទូកម៉ាស៊ីន១គ្រឿង របស់ប្រជាពលរដ្ឋ។
លោក នុត ប៊ុនឌឿន អធិការនគរបាលក្រុងព្រៃវែង បានដឹកនាំកម្លាំងបញ្ជាផ្ទាល់ សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់បារាយណ៍ បានធ្វើកិច្ចប្រតិបត្តិការស៊ើបអង្កេតស្រាវជ្រាវស្វែងរក និងកំណត់បានមុខសញ្ញារហូតឈានដល់ធ្វើការឃាត់ខ្លួនជនសង្ស័យម្នាក់ នៅថ្ងៃទី១៣ ខែតុលា ឆ្នាំ២០២១ វេលាម៉ោង១១និង៣០នាទី ។
សមត្ថកិច្ចបានបញ្ជាក់ថាក្នុងករណីលួចទូកស្មាច់ម៉ាស៊ីនកាណូតរបស់ប្រជាពលរដ្ឋចំនួន២គ្រឿង កាលពីថ្ងៃទី១ ខែសីហា ឆ្នាំ២០២១ ពីចំណុចភូមិអន្លង់ទ្រា ឃុំព្រែកជ្រៃ ស្រុកពោធិ៍រៀង ខេត្តព្រៃវែងរួចមក។
យោងតាមពាក្យបណ្តឹងរបស់ពលរដ្ឋជាម្ចាស់ទូក ដែលគាត់សូមមិនបញ្ចេញឈ្មោះ រស់នៅភូមិអន្លង់ទ្រា ឃុំព្រែកជ្រៃ ស្រុកពោធិ៍រៀង ខេត្តព្រៃវែង បានរៀបរាប់ថា កាលពីថ្ងៃទី១ ខែសីហា ឆ្នាំ២០២១ ពួកគាត់បានបាត់ទូកស្មាច់២គ្រឿងដែលទូក១គ្រឿងមានបណ្តោយប្រវែង៨ម,១តឹក និងទូក១គ្រឿងទៀតមានបណ្តោយប្រវែង៧ម,២តឹក និងមានបំពាក់ម៉ាស៊ីន ២គ្រឿង ម៉ាកហ៊ីណូតាកម្លាំង១៨សេស ដែលគាត់ចាក់សោម៉ាស៊ីនជាប់ជាមួយទូក ទុកបណ្តែតក្នុងទឹកក្រោយផ្ទះក៏ទៅប្តឹងសមត្ថកិច្ចឱ្យជួយស្រាវជ្រាវ ។
ម្ចាស់ទូកបន្តថា ចាប់តាំងពីបាត់ទូកស្មាច់ម៉ាស៊ីន ទាំង២គ្រឿងនោះមក ពួកគាត់បានដើររកគ្រប់ច្រកល្ហកនៅតែមិនឃើញ ។ លុះនៅព្រឹកថ្ងៃទី១៣ ខែតុលា គាត់បានប្រទះឃើញស្គាល់ភិនភាគម៉ាស៊ីនកាណូតរបស់ខ្លួនច្បាស់ ដែលជនសង្ស័យបានយកទៅបំពាក់លើទូករបស់គេ ដើម្បីប្រើប្រាស់ក្នុងការនេសាទត្រី ។
ភ្លាមៗនោះ ពួកគាត់ក៏បានទូរស័ព្ទរាយការណ៍ជូនទៅសមត្ថកិច្ចចុះមកធ្វើការស៊ើបអង្កេតស្រាវជ្រាវ និងឈានដល់ធ្វើការឃាត់ខ្លួនជនសង្ស័យម្នាក់ឈ្មោះ វឿន វាត ភេទប្រុស អាយុ៣០ឆ្នាំ មានទីលំនៅភូមិបារាយណ៍កើត សង្កាត់បារាយណ៍ ក្រុងព្រៃវែង នៅត្រង់ចំណុចក្បែរទួលចាក់សំរាមមួយកន្លែង ។
ក្រោយសមត្ថកិច្ចធ្វើការសាកសួរជនសង្ស័យឈ្មោះ វឿន វាត បានសារភាពថា ខ្លួនពិតជាបានលួចទូកស្មាច់ និងម៉ាស៊ីន២គ្រឿងនេះពិតប្រាកដមែន ដោយម៉ាស៊ីន១គ្រឿងដាក់ទូកខ្លួនឯងប្រើ រីឯ១គ្រឿងទៀតយកទុកនៅឯផ្ទះ ដោយឡែកទូកស្មាច់២គ្រឿងនោះ គឺបានពន្លិចទៅក្នុងទឹក ។
ជនសង្ស័យបន្តថា ការលួចទូកស្មាច់ និងម៉ាស៊ីនកាណូត២គ្រឿងនេះ គឺគាត់មានបក្សពួក២នាក់ ដោយម្នាក់ត្រូវជាឪពុកមារបស់ខ្លួនបានគេចខ្លួនបាត់ហើយ ។ សម្រាប់ជនដែលរត់គេចខ្លួននោះសមត្ថកិច្ចមិនបង្ហាញអត្តសញ្ញាណនោះទេព្រោះកំពុងតាមប្រមាញ់ ។
បច្ចុប្បន្នសមត្ថកិច្ចបានប្រគល់ទូកចំនួន២គ្រឿងនិងម៉ាស៊ីនចំនួន២គ្រឿងទៅឱ្យម្ចាស់វិញ និងបន្តកសាងសំណុំរឿងតាមនីតិវិធី៕
ដោយ៖ អរុណរះ
