សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ នៅព្រឹកថ្ងៃសុក្រ ៩កើត ខែអស្សុជ ឆ្នាំឆ្លូវត្រីស័ក ព.ស ២៥៦៥ ត្រូវនឹងថ្ងៃទី១៥ ខែតុលា ឆ្នាំ២០២១ រដ្ឋបាលខេត្តព្រះ សីហនុ បានរៀបចំពិធីគោរពវិញ្ញាណក្ខន្ធព្រះករុណា ព្រះបាទសម្ដេច ព្រះនរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាព ជាតិខ្មែរ ព្រះបរមរតនកោដ្ឋ គម្រប់ខួប ៩ឆ្នាំ (១៥ តុលា ២០១២ – ១៥ តុលា ២០២១) នៃការយាងសោយព្រះទិវង្គត “ព្រះបរមរតនកោដ្ឋ”។ដោយមានការអញ្ជើញចូលរួមពីលោកប្រធានក្រុមប្រឹក្សាខេត្ត លោកស្រីសមាជិកក្រុមប្រឹក្សាខេត្ត លោកអភិបាលខេត្ត លោកអភិបាលរងខេត្ត នាយក នាយក រងរដ្ឋបាលសាលាខេត្ត មន្ទីរ អង្គភាពពាក់ព័ន្ធ និងកងកម្លាំងប្រដាប់អាវុធ ។
លោក គួច ចំរើន អភិបាលខេត្តព្រះ សីហនុ មានប្រសាសន៍ថា ក្នុងនាម គណ:អភិបាលខេត្ត ថ្នាក់ដឹកនាំខេត្ត និងប្រជាពលរដ្ឋខេត្តព្រះសីហនុ សូមគោរពវិញ្ញាណក្ខន្ធព្រះករុណា ព្រះបាទសម្ដេច ព្រះនរោត្ដមសីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមនររតនកោដ្ឋ គម្រប់ខួប ៩ឆ្នាំ នៃការយាង សោយព្រះទិវង្គត ដើម្បីតបស្នងព្រះមហករុណាទិគុណ និងព្រហ្មវិហារធម៌ដ៏ថ្លៃថ្លាឧត្តុង្គឧត្តមវិសេសវិសាលរបស់ព្រះអង្គដែលបានលះបង់ព្រះកាយពល ព្រះបញ្ញាញាណ ក្នុងព្រះរាជ្យសកម្មភាពណ៍ ដើម្បីបុព្វហេតុឯករាជ្យជាតិ បូរណភាព ទឹកដី ផ្សះផ្សារជាតិ បង្រួបបង្រួមជាតិ និងការអភិវឌ្ឍលើគ្រប់វិស័យ ។
ថ្ងៃទី១៥ ខែតុលា ឆ្នាំ២០២១នេះ គឺជាថ្ងៃគម្រប់ខួប ៩ឆ្នាំ ដែលសម្តេចឪ សម្តេច តា សម្តេចតាទួត ព្រះបិតាឯករាជ្យជាតិខ្មែរ ព្រះបាទសម្តេចព្រះនរោត្ដមសីហនុ ព្រះអង្គបានសោយទិវង្គត។ ប្រជារាស្រ្តទូទាំងប្រទេស ពិសេសប្រជារាស្ត្រខេត្តព្រះ សីហនុ មន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការ គោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំ ធេងចំពោះជាតិ មាតុភូមិកម្ពុជា ។ កូន ចៅប្រជារាស្រ្ត និងមន្រ្តីរាជការ សូមថ្វាយព្រះរាជកុសល ព្រះវិញ្ញាណក្ខន្ធព្រះបរមសពព្រះករុណា ព្រះបាទសម្តេចព្រះនរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាតឡើយ ៕
ដោយ៖ឆ្លាម សមុទ្រ
