សារព័ត៌មាន នគរវត្ត តែងតែនាំមុខគេជានិច្ច
ប្រទេសក្នុងតំបន់អាស៊ាន ក្នុងនោះមានថៃ សិង្ហបុរី ឥណ្ឌូនេស៊ី បានបើកដំណើរការវិស័យទេសចរណ៍ហើយថែមទាំងលើកលែងការធ្វើចត្តាឡីស័កដល់ពលរដ្ឋមកពីប្រទេសដែលមិនមានករណីឆ្លងកូវីដ-១៩ខ្ពស់ ។ នៅពេលនេះដែរហ្វុីលីពីនក៏បានប្រកាសលើកលែងការធ្វើចត្តាឡីស័កដល់អ្នកទេសចរមកពីប្រទេសមួយចំនួនផងដែរ។
អ្នកនាំពាក្យប្រធានាធិបតីហ្វុីលីពីន លោក Harry Roque នៅថ្ងៃទី១៥ខែតុលា បានប្រកាសថា ហ្វុីលីពីននឹងលុបការធ្វើចត្តាឡីស័កដោយបង្ខំដល់អ្នកទេសចរដែលបានចាក់វ៉ាក់សាំងរួចរាល់មកពីប្រទេសចិន និង៤០ប្រទេសផ្សេងទៀតក្នុងតំបន់ដែលមានករណីឆ្លងកូវីដ-១៩ទាប ។
លោក Roque បានឱ្យដឹងថាច្បាប់ថ្មីនឹងអនុវត្តសម្រាប់អ្នកទេសចរមកពីប្រទេសចិន និងប្រទេសក្នុងតំបន់ផ្សេងទៀតស្ថិតនៅក្នុង«បញ្ជីខៀវ» ដែលមានប្រសិទ្ធភាពចាប់ពីថ្ងៃទី១៦ដល់ថ្ងៃទី៣១ខែតុលា។
ជនបរទេសដែលបានចាក់វ៉ាក់សាំងគ្រប់ចំនួនត្រូវធ្វើតេស្តរហ័ស RT-PCR អវិជ្ជមានរយៈពេល៧២ម៉ោងមុនពេលមកកាន់ហ្វុីលីពីន ។ គោលដៅខាងលើគឺដើម្បីទាក់ទាញវិស័យទេសចរណ៍នៅក្នុងប្រទេសនេះដំណើរការរលូន ជួយដល់សេដ្ឋកិច្ចជាតិកាន់តែប្រសើរក្នុងពេលកំពុងប្រឈមវិបត្តិដោយកូវីដ-១៩៕
ដោយ៖ធីរីណា(រូបថត៖AFP/TTXVN)
