សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ យោងតាមប្រភពព័ត៌មានបានឲ្យដឹងថាសមត្ថកិច្ចនគរបាលបានបង្រា្កបនិងឃាត់ខ្លួនជនសង្ស័យម្នាក់ ជាមុខសញ្ញាជួញដូរគ្រឿងញៀនយ៉ាងសកម្ម ។
ជនសង្ស័យត្រូវសមត្ថកិច្ចនគរបាលផ្នែកគ្រឿងញៀន បានបេីកប្រតិបត្តិការបង្ក្រាប និងឃាត់ខ្លួន រួមជាមួយនឹងវត្ថុតាងថ្នាំញៀនជាង០១គីឡូក្រាម ទុកជាវត្ថុតាង។
ករណីខាងលើនេះធ្វើឡើងកាលពីវេលាម៉ោង៤និង៤០នាទីរសៀលថ្ងៃទី២៥ ខែតុលាម្សិលមិញនេះ ខណៈជនសង្ស័យកំពុងធ្វើដំណើរតាមដងផ្លូវ មកដល់ត្រង់ចំណុចភូមិអណ្ដូងកន្ទូត ឃុំដូនបា ស្រុកគាត់ក្រឡ ។
លោកអធិការស្រុកគាស់ក្រឡលោក ប៉ាង ហៀង បានឱ្យដឹងនៅព្រឹកថ្ងៃទី២៦ ខែតុលា ឆ្នាំ២០២១នេះថា ជនសង្ស័យមានឈ្មោះ រស់ សុវី ភេទប្រុសអាយុ៣៦ឆ្នាំ រស់នៅភូមិជំនីក ឃុំអន្លង់វិល ស្រុកសង្កែ។
លោកបន្តថាជននេះត្រូវកម្លាំងរបស់លោកស្ទាក់បង្ក្រាបបាន ពេលកំពុងធ្វើដំណើរតាមផ្លូវ បន្ទាប់ពីមន្ត្រីជំនាញកំណត់បាននូវមុខសញ្ញា ដែលពាក់ព័ន្ធនឹងការរត់ពន្ធគ្រឿងញៀន ដែលជននេះនាំចេញពីផ្ទះរបស់ខ្លួនបម្រុងឆ្ពោះទៅកាន់ស្រុកសសំឡូតលក់បន្តឲ្យអ្នកផ្សេង។
លោក ប៉ាង ហៀង បានបញ្ជាក់ថា ជាមួយនឹងការឃាត់ខ្លួន នេះកម្លាំងរបស់លោកបានដកហូតវត្ថុតាងមួយចំនួនធំ មានថ្នាំញៀនជាងមួយគីឡូក្រាម។
សូមបញ្ជាក់ថានៅក្នុងរបាយការណ៍បានឲ្យដឹងថា វត្ថុតាងដែលរឹបអូសបានពីជនសង្ស័យខាងលើនេះ មានថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន០១មួយថង់ធំ មានទម្ងន់១០៣៦,៧៣ ក្រាម រថយន្ត០១គ្រឿងម៉ាក តូយ៉ូតា កាមេរី ពាក់ស្លាកលេខភ្នំពេញ 2Q-9842 រួមទាំងវត្ថុតាងពាក់ព័ន្ធមួយចំនួនទៀត។
លោក ប៉ាង ហៀង អធិការស្រុកគាស់ក្រឡ បានឱ្យដឹងទៀតថា ជនសង្ស័យខាងលេីនេះ បានព្យាយាមដឹកជញ្ជូនថ្នាំញៀននេះពីបាត់ដំបង ឆ្ពោះទៅកាន់ស្រុកសំឡូត តែដោយសារកម្លាំងជំនាញទទួលបានព័ត៌មានច្បាស់ ទើបស្ទាក់ចាប់បានត្រង់ចំណុចខាងលើ ពេលកំពុងធ្វើដំណើរ។
បច្ចុប្បន្នមន្ត្រីជំនាញផ្នែកប្រឆាំងគ្រឿងញៀ កំពុងសួរនាំនិងកសាងសំណុំរឿងបញ្ជូនបន្តទៅចាត់ការតាមនីតិវិធីច្បាប់៕
ដោយ៖ អរុណរះ
