សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ជនសង្ស័យម្នាក់ក្នុងចំណោម២នាក់ត្រូវបានសមត្ថកិច្ចឃាត់ខ្លួនពាក់ព័ន្ធករណីឆក់ទូរស័ព្ទដៃ ពីជនរងគ្រោះមិនបានសម្រេច។
ហេតុការណ៍នេះបានកើតឡើងកាលពីវេលាម៉ោង៦និង៤៥នាទីព្រលប់ថ្ងៃទី២៧ខែតុលា ឆ្នាំ២០២១នៅចំណុចសួនតាឌី ស្ថិតនៅភូមិ រោងបន្លែ សង្កាត់ស្វាយរៀង ក្រុងស្វាយរៀង ។
សមត្ថកិច្ចនគរបាលក្រុងស្វាយរៀងបានឱ្យដឹងថាជនសង្ស័យមានឈ្មោះ សុភាព កាណារ៉ា អាយុ១៨ឆ្នាំមុខរបរមិនពិតប្រាកដ រស់នៅភូមិ ស្វាយរៀង សង្កាត់ស្វាយរៀង ក្រុងស្វាយរៀង ចំណែកម្នាក់ទៀតបានរត់គេចខ្លួនភ្លាមៗ។
រីឯបុរសម្ចាស់ទូរស័ព្ទមានឈ្មោះស៊ុំ រ៉ាម៉ន អាយុ២១ ឆ្នាំមុខរបរ កម្មកររោងចក្រ រស់នៅភូមិ ស្រម៉ជ្រុំ សង្កាត់ សង្ឃ័រ ក្រុងស្វាយរៀង ។
តាមសាក្សីបានឱ្យដឹងថាមុនកើតហេតុគេឃើញជនសង្ស័យ២នាក់បានជិះម៉ូតូមួយគ្រឿងម៉ាកស៊ុយសូគីNEX (និច)ពណ៌ទឹកប្រាក់ ពាក់ស្លាកលេខ ស្វាយរៀង ១O-២០៥៨នៅចំណុចសួនតាឌីរួចក៏បានធ្វើសកម្មភាពឆក់ទូរស័ព្ទដៃជនរងគ្រោះតែ មិនបានសម្រេចទើបបង្កការភ្ញាក់ផ្អើលដល់សមត្ថកិច្ចមកអន្តរាគមន៍ដេញចាប់និងឃាត់ខ្លួនបានម្នាក់។
បច្ចុប្បន្ន ជនសង្ស័យ និងមធ្យោបាយម៉ូតូដែលធ្វើសកម្មភាពត្រូវបានសមត្ថកិច្ចបញ្ជូនទៅអធិការដ្ឋាននគរបាលក្រុងស្វាយរៀង និងកំពុងស្រាវជ្រាវរកជនសង្ស័យម្នាក់ទៀតកំពុងរត់គេចខ្លួន ដើម្បីចាត់ការតាមច្បាប់ ៕
ដោយ៖ យឹម សុថាន
