មនុស្ស០២នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍

ខេត្តបន្ទាយមានជ័យ៖ មនុស្ស០២នាក់បានស្លាប់ភ្លាមៗក្នុងហេតុការណ៍គ្រោះថ្នាក់ចរាចរណ៍រវាងរថយន្តធំបុកជាមួយរថយន្តតូច នៅវេលាម៉ោង ០៥និង៤០នាទីល្ងាចថ្ងៃទី៣០ ខែតុលា ឆ្នាំ២០២១ លើកំណាត់ផ្លូវជាតិលេខ៦  ខាងលិចស្ពានត្បែងប្រហែល ៤០០ម៉ែត្រ ស្ថិតនៅភូមិរំដួល ឃុំភ្នំលៀប ស្រុកព្រះនេត្រព្រះ  ។

លោក មាស ប្ញទ្ធី អធិការនគរបាលស្រុក ព្រះនេត្រព្រះ បានឲ្យដឹងថា៖ជនរងគ្រោះ ក្នុងករណីគ្រោះថ្នាក់ចរាចរណ៍នេះ មាន៖ឈ្មោះ គង់ ឆាយទាំង ភេទ ប្រុស អាយុ ២៩ឆ្នាំ នៅភូមិ៤សង្កាត់ បឹងព្រលិត ខណ្ឌ៧មករា ក្រុងភ្នំពេញ អ្នកបើកបររថយន្តនិង អ្នករួមដំណើរ ឈ្មោះគង់ ព្រូ ភេទប្រុសអាយុ ៣៧ឆ្នាំនៅសង្កាត់បឹងសាឡាង ខណ្ឌទួលគោក ក្រុងភ្នំពេញ ។

លោកអធិការ បានបញ្ជាក់ថា៖ នៅមុនពេលកើតហេតុ មានរថយន្តមួយគ្រឿងម៉ាកហាយឡេនឌ័រ  ពណ៌ប្រផេះ ពាក់ស្លាកលេខ ភ្នំពេញ 2S-7653  បើកបរដោយឈ្មោះ គង់ ឆាយទាំង បានបើកពីទិសខាងកើតទៅទិសខាងលិច មានល្បឿនលឿនពេលមកដល់ចំណុចកើតហេតុខាងលើ បានបែកកង់ក្រោយខាងស្ដាំហើយបានរេចង្កូតចុះឡើងមកទទឹងកណ្ដាលទ្រូងផ្លូវ នៃគន្លងផ្លូវខាងស្ដាំ ស្របពេលនោះមានរថយន្តមួយគ្រឿងម៉ាកហុីណូ ពណ៌ខៀវ ក្បាលរថយន្ត ពាក់ស្លាកលេខ ព្រះសីហនុ 3A-2451 និងសឺម៉ីរុឺម៉ក ពាក់ស្លាកលេខ ព្រះសីហនុ 4A-3150 បើកមកពីទិសខាងលិចទៅខាងកើតបានបុករថយន្ត ហាយឡេនឌ័រ ដែលនៅទទឹងផ្លូវចំពាក់កណ្ដាលតួរថយន្តខាងឆ្វេងពេញទំហឹង បណ្តាលឲ្យអ្នកបើកបរនិងអ្នករួមដំណើរគាបជាប់ក្នុងរថយន្តស្លាប់នៅនឹងកន្លែងទាំង០២នាក់ ។ ចំណែកអ្នកបើកបររថយន្ត HINO បានរត់គេចខ្លួនពី កន្លែងកើតហេតុ ។ចំពោះរថយន្តទាំង០២គ្រឿងខូចខាតធ្ងន់ ។ សពជនរងគ្រោះទាំង០២នាក់ត្រូវបានកម្លាំងជំនាញចរាចរណ៍ នៃអធិការដ្ឋាននគរបាលស្រុក ព្រះនេត្រព្រះ  យកមកតម្កល់ទុក នៅវត្តរហាល រង់ចាំសាច់ញាតិមកពីទីក្រុងភ្នំពេញ ទទួលយកទៅធ្វើបុណ្យតាមប្រពៃណី ៕

ដោយ ៖ វណ្ណា