សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានម៉ូតូពីរគ្រឿងបានបុកគ្នាក្នុងទិសដៅបញ្ច្រាសគ្នាយ៉ាងពេញទំហឹង បណ្ដាលឲ្យបុរសម្នាក់បានស្លាប់ភ្លាមៗនៅនឹងកន្លែង រីឯមនុស្សប្រុសស្រី២នាក់ទៀតរងរបួសធ្ងន់ត្រូវបានរថយន្តសាមុយដឹកបញ្ជូនទៅកាន់មន្ទីរពេទ្យដេីម្បីសង្គ្រោះអាយុជីវិត។ ហេតុការណ៍នេះបង្កការភ្ញាក់ផ្អេីលកាលវេលាម៉ោង៨និង៣០នាទីយប់ថ្ងៃទី៣០ ខែតុលា ឆ្នាំ២០២១ ស្ថិតនៅតាមបណ្ដោយផ្លូវបេតុងឌួងងៀប ត្រង់ចំណុចមុខបុរីទារក កុមារជាតិ ក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ។
ជនរងគ្រោះដែលស្លាប់នៅមិនទាន់ស្គាល់អត្តសញ្ញាណនៅឡើយទេ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ជិះម៉ូតូស្មាស់រីវ៉ូ ពណ៌ខ្មៅ ពាក់ស្លាកលេខភ្នំពេញ1AL-4707 ជិះដោយបុរសម្នាក់តាមបណ្ដោយផ្លូវបេតុងឌួងងៀបពីជើងទៅត្បូងក្នុងល្បឿនយ៉ាងលឿន ខណៈមកដល់ចំណុចកើតហេតុខាងលើបានបើកវ៉ាជែងរថយន្តជ្រុលចូលទៅក្នុងចំណែកផ្លូវម្ខាងទៀតហើយទៅបុកម៉ូតូហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ1IR -3099 បើកដោយយុវជនម្នាក់រួមដំណើរជាមួយនារីម្នាក់ក្នុង ទិសដៅបញ្ច្រាសគ្នាពីត្បូងទៅជើងចំបញ្ឆិតចំហៀងពេញទំហឹងបណ្ដាលឱ្យភាគីខាងម៉ូតូស្មាស់រីវ៉ូស្លាប់ភ្លាមៗនៅនឹងកន្លែងកេីតហេតុ ចំណែកភាគីប្រុសស្រី២នាក់ខាងម៉ូតូហុងដាឌ្រីមរងរបួសធ្ងន់ត្រូវបានបញ្ជូនទៅសង្គ្រោះនៅឯមន្ទីរពេទ្យភ្លាមៗ ។
ក្រោយកើតហេតុ សមត្ថកិច្ចមូលដ្ឋាន និងជំនាញចរាចរណ៍ខណ្ឌមានជ័យបានចុះមកធ្វេីការវាស់វែងយកម៉ូតូទាំងពីរគ្រឿងទៅរក្សាទុករង់ចាំដោះស្រាយបន្តតាមក្រោយ ។ ដោយឡែកសពជនរងគ្រោះត្រូវបានសមត្ថកិច្ចធ្វើកំណត់ហេតុ និងទាក់ទងទៅក្រុមគ្រួសារឱ្យមកទទួលយកទៅធ្វើបុណ្យតាមប្រពៃណី៕
ដោយ ៖ ភារ៉ា ដង្កោ
