សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបាក់ជេីងទាំងសងខាង ខណៈជិះម៉ូតូក្នុងល្បឿនយ៉ាងលឿនមិនប្រយ័ត្នជ្រុលទៅបុករថយន្តស៊េរីទំនេីបមួយគ្រឿងដែលកំពុងបត់ឆ្វេងឆ្លងផ្លូវពេញទំហឹង កាលពីវេលាម៉ោង៨និង៣០នាទីយប់ថ្ងៃចន្ទ ទី៨ ខែវិច្ឆិកា ឆ្នាំ២០២១ ស្ថិតនៅតាមបណ្ដោយផ្លូវ៦០ម៉ែត្រ ត្រង់ចំណុចច្រកចូលបុរីប៉េងហួត ក្នុងសង្កាត់ចាក់អង្រែក្រោម ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ជិះម៉ូតូម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខព្រៃវែង1L-1670 ធ្វើដំណើរតាមបណ្ដោយផ្លូវ៦០ម៉ែត្រក្នុងទិសដៅពីត្បូងទៅជើងយ៉ាងលឿន ខណៈមកដល់ចំណុចកើតហេតុខាងលើបានជ្រុលទៅបុករថយន្តស៊េរីទំនើបម៉ាក ម៉ាស្ដា ពណ៌ស ពាក់ស្លាកលេខភ្នំពេញ2BM-4662 បើកបរដោយនារីម្នាក់និងមាននារីម្នាក់ទៀតរួមដំណើរក្នុងទិសដៅពីជើងទៅត្បូងហើយបានបត់ឆ្វេងឆ្លងផ្លូវបំណងចូលទៅក្នុងបុរី ចំថ្ពាល់ខាងស្ដាំរថយន្តពេញទំហឹង បណ្ដាលឱ្យម្ចាស់ម៉ូតូបាក់ជេីងទាំងសងខាងរងរបួសធ្ងន់ ហេីយភ្លាមៗនោះប្រជាពលរដ្ឋបានទាក់ទងទៅរថយន្តសាមុយឱ្យមកដឹកជនរងគ្រោះយកទៅកាន់មន្ទីរពេទ្យដេីម្បីសង្គ្រោះបន្ទាន់ ។
ក្រោយកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍រាជធានីភ្នំពេញ បានមកធ្វេីការវាស់វែងយករថយន្តនិងម៉ូតូទៅរក្សាទុក រង់ចាំដោះស្រាយនៅពេលក្រោយ ៕
ដោយ ៖ ភារ៉ា ដង្កោ
