សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តហ៉ីយ៉ាន់ដាយមួយគ្រឿងត្រូវបានអ្នកបើកៗលឿនជ្រុលទៅបុកម៉ូតូពីក្រោយហើយកិនអូសបណ្តាលឱ្យបុរសអ្នកបើកម៉ូតូស្លាប់ភ្លាមៗយ៉ាងអាណោចអាធ័មខណៈគាត់កំពុងជិះម៉ូតូ។ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អេីលកាលពីវេលាម៉ោង១១និង២០នាទីយប់ ថ្ងៃទី៨ ខែវិច្ឆិកា ឆ្នាំ២០២១ នៅចំណុចស្ពានដែកចំការដូង តាមបណ្តោយផ្លូវលេខ២១៧ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
សពជនរងគ្រោះមានឈ្មោះ ហៃ គីណូ អាយុជាង៤០ឆ្នាំ មុខរបរ វិស្វករ ស្នាក់នៅ បុរីពិភពថ្មី ចំការដូង ខណ្ឌដង្កោ ។
ចំណែកអ្នកបេីកបររថយន្តឈ្មោះថា គៀរ ភេទប្រុស អាយុ៣០ឆ្នាំ មុខរបរបេីករថយន្ត ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកេីតហេតុគេបានឃេីញបុរសម្នាក់ជិះម៉ូតូម៉ាកស្គូពី ពណ៌ស ពាក់ស្លាកលេខភ្នំពេញ1HV 3218 ធ្វេីដំណេីរតាមបណ្តោយផ្លូវលេខ៣៧១ ក្នុងទិសដៅពីកេីតទៅលិច ខណៈមកដល់ចំណុចកេីតហេតុក៏បត់ឆ្វេងទៅត្បូងតាមផ្លូវលេខ២១៧ ភ្លាមនោះស្រាប់តែមានរថយន្តម៉ាកហ៉ីយ៉ាន់ដាយពណ៌សឆ្នូតក្រហម ពាក់ស្លាកភ្នំពេញ3D-8306 បើកតាមបណ្តោយផ្លូវលេខ២១៧ ក្នុងទិសដៅពីជេីងទៅត្បូងក៏ជ្រុលទៅបុកម៉ូតូពីក្រោយបណ្តាលឱ្យម្ចាស់ម៉ូតូដួលចូលក្រោមរថយន្តកិនស្លាប់ភ្លាមៗនៅកន្លែងកេីតហេតុ ហេីយរថយន្តព្យាយាមបេីកគេចខ្លួនបានប្រហែល៤០ម៉ែត្រក៏ឈប់រថយន្តហើយចុះរត់គេចខ្លួនតែត្រូវប្រជាពលរដ្ឋដេញចាប់បានភ្លាមៗ។
ក្រោយកេីតហេតុសមត្ថកិច្ចមូលដ្ឋានបានចុះមកដល់ចំណុចកេីតហេតុនិងទំនាក់ទំនងទៅជំនាញការិយាល័យចរាចរណ៍ជេីងគោកនៃស្នងការដ្ឋាននគរបាលរាជធានីភ្នំពេញមកធ្វេីការវាស់វែងយករថយន្តនិងម៉ូតូរួមទាំងតៃកុងរថយន្តទៅទុករង់ចាំដោះស្រាយតាមច្បាប់។ ចំណែកសពជនរងគ្រោះត្រូវបានប្រគល់ជូនក្រុមគ្រួសារយកទៅធ្វេីបុណ្យតាមប្រពៃណី៕
ដោយ៖សុខាសែនជ័យ
