សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់សង្ស័យងងុយដេក បានបេីករថយន្តម៉ាកហុីយ៉ាន់ដាយដឹកសម្ភារគ្រឿងសំណង់ហើយរអិលធ្លាក់ចូលទឹកស្រះ បង្កឱ្យមានការភ្ញាក់ផ្អើលកាលពីវេលាម៉ោង១១ និង ៣០នាទីព្រឹកថ្ងៃទី១០ ខែវិច្ឆិកា ឆ្នាំ២០២១នៅផ្លូវបេតុង ក្នុងភូមិរលួស សង្កាត់រលួស ខណ្ឌដង្កោ។
យោងតាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនពេលកើតហេតុគេឃើញបុរសម្នាក់បើករថយន្តម៉ាកហុីយ៉ាន់ដាយ ពណ៌ស ពាក់ស្លាកលេខ ភ្នំពេញ 3F-2319 ធ្វើដំណើរតាមផ្លូវបេតុងក្នុងទិសដៅពីជើងទៅត្បូង ខណៈមកដល់ចំណុចកើតហេតុមិនដឹងជាយ៉ាងម៉េចទេ ស្រាប់តែរេចង្កូតមកខាងស្ដាំរអិលធ្លាក់ចូលទឹកស្រះតែម្ដង ហើយភ្លាមៗនោះអ្នកបើកបររថយន្តបានបើកទ្វារចុះទាន់ពេល រួចទុករថយន្តចោលគេចខ្លួនបាត់ស្រមោលទៅ។
ក្រោយកើតហេតុ សមត្ថកិច្ចមូលដ្ឋានប៉ុស្តិ៍នគរបាលរដ្ឋបាលរលួសបានចុះមកដល់ទីតាំងកើតហេតុ និងបានពិនិត្យទៅលើរថយន្តបង្ក ដោយឃើញថារថយន្តនេះមិនបង្កគ្រោះថ្នាក់ឬក៏មានរបួសស្នាមដល់អ្នកដទៃនិងមិនខូចខាតដល់សម្បត្តិរដ្ឋទើបសមត្ថកិច្ចអនុញ្ញាតឲ្យខាងតំណាងរថយន្តហៅរថយន្តស្ទូចមកស្ទូចយករថយន្តបង្កយកទៅជួសជុលដោយខ្លួនឯង ៕
ដោយ ៖ ភារ៉ា ដង្កោ
