សារព័ត៌មាន នគរវត្ត តែងតែនាំមុខគេជានិច្ច
ក្លិបសេះបង្កង់ Juventus នៅលីគកំពូលអុីតាលីបានប្រកាសថា ខ្សែការពាររបស់ក្រុម Juventus កីឡាករ Danilo នឹងខកខានការប្រកួតសំខាន់ៗក្នុងរយៈពេល៨សប្តាហ៍ដោយសារបញ្ហារបួសភ្លៅ។
កីឡាករសញ្ជាតិប្រេស៊ីលរូបនេះបានបង្ហាញខ្លួនក្នុងការប្រកួតទាំងអស់លើកលែងតែ៣ប្រកួតរបស់ Juventus នៅក្នុងការប្រកួតទាំងអស់នៅរដូវកាលនេះ ប៉ុន្តែត្រូវបានបង្ខំឱ្យសម្រាកដោយរបួសអំឡុងពេលប្រកួតឈ្នះ ២-០ នៅ Serie A កាលពីថ្ងៃសៅរ៍លើក្រុម Lazio ក្នុងទីក្រុងរ៉ូម។
ក្លិប Juventus បានប្រកាសថា “ការធ្វើតេស្ដរោគវិនិច្ឆ័យបានបង្ហាញពីរបួសកម្រិតមធ្យមនៃសាច់ដុំសរសៃវែងនៃភ្លៅខាងឆ្វេងរបស់កីឡាករDanilo។ ពេលវេលាសង្គ្រោះដំបូងត្រូវបានរំពឹងថានឹងមានរយៈពេលប្រហែល៨សប្តាហ៍”។
ក្លិបដែលមានមូលដ្ឋាននៅទីក្រុង Turin បច្ចុប្បន្នកំពុងឈរនៅលេខរៀងទី៨ក្នុងតារាង Serie A បន្ទាប់ពីចាប់ផ្តើមរដូវកាលមិនបានល្អ ប៉ុន្តែពួកគេឈរលេខ១នៅលើតារាង UEFA Champions League ពូល H ដែលមានពិន្ទុ១២ពិន្ទុស្មើក្រុម Chelsea កំពុងឈរលេខ២ ក្រោយពីក្រុម Juventus បានចាញ់ក្រុមតោខៀវកាលពីយប់ថ្ងៃអង្គារក្នុងលទ្ធផល៤ទល់០។
Danilo នឹងត្រូវអវត្តមានយ៉ាងហោចណាស់១២ប្រកួត រួមទាំងការប្រកួតនៅអឺរ៉ុបទល់នឹងក្រុម Malmo និងការប្រកួតលីគជាមួយ Atalanta, Napoli និង AS Roma និងការប្រកួត Italian Super Cup ទល់នឹង Inter Milan ក្នុងខែមករាផងដែរ ៕
ដោយ៖ ភារៈ(រូបភាព ៖ CNA)
