សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ បុរសជនជាតិចិនបើករថយន្តបុកម៉ូតូ២គ្រឿងបណ្តាលឲ្យនារី២នាក់ស្លាប់ភ្លាមៗនៅនឹងកន្លែង និងបុរសម្នាក់ទៀតរងរបួសធ្ងន់ លើផ្លូវជាតិលេខ៣កំពត វាលរេញ ត្រង់ចំណុចមុខប៉ុស្តិ៍នគរបាលរដ្ឋបាលសង្កាត់ព្រែកត្នោត ចន្លោះបង្គោលគីឡូម៉ែត្រលេខ១៧៧-១៧៨ ស្ថិតក្នុងភូមិព្រែកក្រែង សង្កាត់ព្រែកត្នោត ក្រុងបូកគោ ខេត្តកំពត កាលពីម៉ោងជាង៦ល្ងាច ថ្ងៃទី២៥ ខែវិច្ឆិកា ឆ្នាំ២០២១។
សមត្ថកិច្ចបានឲ្យដឹងថា រថយន្តបង្កម៉ាកតូយ៉ូតាហ្វតធូន័រ ពណ៌ស ពាក់ស្លាកលេខភ្នំពេញ 2BE-2988 មុនពេលកើតហេតុ គេឃើញរថយន្តមួយគ្រឿងម៉ាកហ្វតធូន័រ ពណ៌ស មួយគ្រឿងបើកបរដោយបុរសជនជាតិចិនម្នាក់ក្នុងល្បឿនលឿនក្នុងទិសដៅពីកើតទៅលិច លុះមកដល់ចំណុចកើតហេតុ ដោយមិនដឹងថា ជាមានបញ្ហាអ្វី ក៏បានរេចង្កូតទៅបុកម៉ូតូម៉ាកហុងដា ចំនួនពីរគ្រឿងដែលមានទិសដៅផ្ទុយគ្នាពីលិចទៅកើត បណ្តាលឲ្យមនុស្សស្រី២នាក់ បានស្លាប់ភ្លាមៗនៅកន្លែងកើតហេតុ និងបុរសម្ននាក់ទៀតរងរបួសធ្ងន់។
សមត្ថកិច្ចបានឲ្យដឹងទៀតថា អ្នកបើកបរជាជនជាតិចិនខាងលើនេះ មានឈ្មោះ Liu Wie ភេទប្រុស អាយុ៣១ឆ្នាំ មិនមានរងរបួសទេ។ ចំណែកម៉ូតូរងគ្រោះម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ស្លាកលេខ ព្រះសីហនុ ១D-៧០៥៥ ខូចខាតធ្ងន់ បើកបរដោយជនរងគ្រោះឈ្មោះ ណុប សំបូរ ភេទស្រី រស់នៅភូមិបុសញិញ ឃុំកូនសត្វ ស្រុកទឹកឈូ ខេត្តកំពត ស្លាប់នៅកន្លែងកើតហេតុ និងអ្នករួមដំណើរម្នាក់ ភេទស្រី ក៏ស្លាប់នៅកន្លែងកើតហេតុដែរ ហើយសមត្ថកិច្ចមិនទាន់ស្គាល់អត្តសញ្ញាណនៅឡើយ។
ក្រោយពេលកើតហេតុ សាកសពនារីរងគ្រោះទាំង២នាក់ ត្រូវបានសមត្ថកិច្ចប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ចំណែកវត្ថុតាង (រថយន្ត និង ម៉ូតូ) ត្រូវបានកម្លាំងជំនាញយកមករក្សាទុកនៅប៉ុស្តិ៍សង្កាត់ព្រែកត្នោត ដើម្បីរង់ចាំដោះស្រាយតាមផ្លូវច្បាប់ជូនគ្រួសារជនរងគ្រោះនៅពេលក្រោយ៕
ដោយ៖ជ្រោយពេជ្រ
