សារព័ត៌មាន នគរវត្ត តែងតែនាំមុខគេជានិច្ច
ខ្សែការពារសញ្ជាតិអាឡឺម៉ង់ Antonio Rudiger មិនចាប់អារម្មណ៍លើការបន្តស្នាក់នៅក្នុងក្របខ័ណ្ឌ Premier League ហើយត្រូវបានក្លិបកំពូលៗជាច្រើននៅអឺរ៉ុបចង់បាន ជាពិសេសគឺក្លិបយក្សនៅអេស្ប៉ាញ Real Madrid។
ក្រុម Real Madrid មានសុទិដ្ឋិនិយមអំពីឱកាសរបស់ពួកគេក្នុងការចុះហត្ថលេខាលើកីឡាកររូបនេះ ហើយកំពុងផ្តល់អាទិភាពដល់ការផ្លាស់ប្តូរសម្រាប់កីឡាករ Chelsea រូបនេះ ខណៈដែលពួកគេសម្លឹងមើលការពង្រឹងតំបន់ការពាររបស់ក្លិប។
កិច្ចសន្យារបស់ខ្សែការពារកណ្តាលវ័យ២៨ឆ្នាំនៅកីឡដ្ឋាន Stamford Bridge នឹងផុតកំណត់នៅរដូវក្តៅឆ្នាំ២០២២ ហើយគាត់មិនមានបំណងបន្តកិច្ចសន្យារបស់គាត់នោះទេ។
ក្លិបតោខៀវ Chelsea បានផ្តល់អាទិភាពក្នុងការបន្តកុងត្រារបស់ Rudigerសូម្បីតែលើសពីការព្យាយាមចុះហត្ថលេខា Raphael Varane ពី Real Madrid មុនពេលដែលគាត់បានចូលរួមជាមួយ Manchester United ក្នុងទីផ្សារដោះដូរកីឡាករចុងក្រោយ។
គ្រូបង្វឹកលោក Thomas Tuchel បានចូលរួមក្នុងការព្យាយាមបញ្ចុះបញ្ចូលកីឡាករអន្តរជាតិអាឡឺម៉ង់រូបនេះឱ្យប្តេជ្ញាចិត្តចំពោះលក្ខខណ្ឌថ្មីៗ ប៉ុន្តែហាក់ដូចជាមិនអាចទៅរួចនោះទេ។ ការផ្តល់ជូនចុងក្រោយដែលក្រុមតោខៀវបានធ្វើគឺប្រហែល៨លានអឺរ៉ូ (៩លានដុល្លារ) សុទ្ធក្នុងមួយឆ្នាំ ប៉ុន្តែ Rudiger ដឹងថា គាត់នឹងនៅតែទទួលបានប្រាក់ខែតិចជាងមិត្តរួមក្រុមដូចជា Ruben Loftus-Cheek, Kepa Arrizabalaga, Marcos Alonso, Timo Werner, Thiago Silva, Kai Havertz និង RomeluLukaku ។
បន្ទាប់ពីការត្រឡប់មកវិញរបស់លោក Carlo Ancelotti ក្នុងនាមជាគ្រូបង្វឹក ក្រុម Real Madrid បាននិងកំពុងពិភាក្សាអំពីការផ្លាស់ប្តូរសម្រាប់ខ្សែការពារកណ្តាលថ្មី។ Rudiger គឺជាបេក្ខជនដែលពេញចិត្ត ហើយក្រុមអធិរាជសសង្ឃឹមថានឹងបន្ថែមគាត់ដើម្បីចាប់ដៃគូជាមួយ Eder Militao, David Alaba និង Nacho ជាដើម។
Real Madrid បានសិក្សាពីជម្រើសផ្សេងទៀតក្នុងការស្វែងរកខ្សែការពារកណ្តាលថ្មី ប៉ុន្តែពួកគេមានសុទិដ្ឋិនិយមចំពោះការចុះហត្ថលេខាលើ Rudiger បើទោះបីជាមានឧបសគ្គជាច្រើនដែលឈរនៅក្នុងផ្លូវរបស់ពួកគេក៏ដោយ។ មួយក្នុងចំណោមនោះគឺថាស្ថានភាពកិច្ចសន្យារបស់ Rudiger ធ្វើឱ្យគាត់ចង់បានដោយក្រុមកំពូលៗជាច្រើននៅអឺរ៉ុបដោយមានទាំង Bayern Munich និង Paris Saint-Germain ក៏កំពុងតាមដានយ៉ាងជិតស្និទ្ធលើខ្សែការពាររូបនេះផងដែរ។ បញ្ហាមួយទៀតដែលក្លិបនឹងត្រូវចរចានោះគឺការលំបាកក្នុងការបំពេញតម្រូវការប្រាក់ខែរបស់គាត់ ខណៈដែលប្រព័ន្ធផ្សព្វផ្សាយក្នុងប្រទេសអង់គ្លេស និងអាល្លឺម៉ង់អះអាងថា គាត់ចង់បានប្រហែល១៤លានដុល្លារសុទ្ធក្នុងមួយរដូវកាល ៕
ដោយ៖ ភារៈ(រូបភាព ៖ goal.com)
