សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានរងរបួសធ្ងន់ ត្រូវរថយន្តសាមុយដឹកយកទៅសង្គ្រោះអាយុជីវិតភ្លាមៗ បន្ទាប់ពីជិះម៉ូតូលឿនពេកមិនប្រយ័ត្នជ្រុលទៅបុករថយន្តដែលកំពុងបេីកឆ្លងផ្លូវពេញទំហឹង កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី១៣ ខែធ្នូ ឆ្នាំ២០២១ នៅចំណុចមុខមជ្ឈមណ្ឌល ព្រីងផ្លាហ្សា តាមបណ្ដោយមហាវិថីព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន ។
យោងតាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេឃេីញរថយន្តម៉ាក MG RX5 ពណ៌ស ពាក់ស្លាកលេខភ្នំពេញ 2BA-8020 បេីកចេញពីផ្លូវលំជាប់អគារព្រីងផ្លាហ្សា ឆ្លងមហាវិថីព្រះនរោត្ដមឆ្ពោះទៅទិសខាងជេីង ខណៈបើកឆ្លងបានពាក់កណ្ដាលផ្លូវ ក៏ត្រូវបុរសម្នាក់ជិះម៉ូតូម៉ាកហុងដាឌ្រីម ស៊េរីឆ្នាំ២០២១ ពណ៌ខ្មៅ ពាក់ស្លាកលេខ កណ្ដាល 1AJ-5580 ដែលតាមបណ្ដោយមហាវិថីព្រះនរោត្ដមក្នុងទិសដៅពីជេីងទៅត្បូងយ៉ាងលឿន និងមិនប្រយ័ត្ននោះបានទៅបុករថយន្តចំកង់ក្រោយចំហៀងខាងឆ្វេងពេញទំហឹង បណ្ដាលឱ្យម៉ូតូបាក់កាំកង់មុខខូចខាតយ៉ាងដំណំ ចំណែករថយន្តខូចខាតតិចតួចប៉ុណ្ណោះ ក្នុងនោះដែរម្ចាស់ម៉ូតូបានរងរបួសធ្ងន់ត្រូវបានប្រជាពលរដ្ឋទាក់ទងទៅរថយន្តសាមុយឱ្យមកដឹកជនរងគ្រោះយកទៅសង្គ្រោះភ្លាមៗ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ ហើយបានលេីកម៉ូតូនិងយករថយន្តទៅដាក់អែបខាងសិនដេីម្បីកុំឲ្យមានការកកស្ទះចរាចរណ៍ដល់អ្នកដំណេីរ ។ បន្ទាប់មកសមត្ថកិច្ចជំនាញចរាចរណ៍ខណ្ឌចំការមនបានចុះមកដល់ហេីយធ្វេីការវាស់វែងយករថយន្តនិងម៉ូតូទៅរក្សាទុករង់ចាំដោះស្រាយតាមនីតិវិធីនាពេលក្រោយ ៕
ដោយ ៖ ភារ៉ា ដង្កោ
