សារព័ត៌មាន នគរវត្ត តែងតែនាំមុខគេជានិច្ច
ក្លិបអធិរាជស Real Madrid បានក្លាយជាអ្នកនាំមុខគេក្នុងការចុះហត្ថលេខាលើកីឡាករ Antonio Rudiger បន្ទាប់ពីមានការពិភាក្សាជាវិជ្ជមានជាមួយខ្សែការពារក្រុម Chelsea រូបនេះអំពីការចូលរួមដោយមិនគិតតម្លៃផ្ទេរនៅរដូវក្តៅក្រោយ។
Rudiger មិនទាន់មានការរីកចម្រើនជាមួយ Chelsea ជុំវិញការបន្តកុងត្រាថ្មីរបស់គាត់នោះទេ ហើយលទ្ធភាពនៃការចាកចេញរបស់គាត់គឺជាការព្រួយបារម្ភសម្រាប់លោក Thomas Tuchel ដែលកំពុងដោះស្រាយភាពមិនច្បាស់លាស់ជុំវិញខ្សែការពារ៤នាក់។ កីឡាករ César Azpilicueta, Andreas Christensen និង Thiago Silva ក៏ផុតកុងត្រាដែរនៅចុងបញ្ចប់នៃរដូវកាលនេះ បើទោះបីជា Silva ត្រូវបានគេរំពឹងថានឹងយល់ព្រមបន្តរយៈពេល១ឆ្នាំឆាប់ៗនេះក៏ដោយ។
លោក Thomas Tuchel បាននិយាយថា គាត់មិនចង់បាត់បង់ Rudigerដែលបានដើរតួយ៉ាងសំខាន់ក្នុងក្រុម Chelsea ឈ្នះពានរង្វាន់Champions League កាលពីរដូវកាលមុនទេ។ កីឡាករវ័យ២៨ឆ្នាំរូបនេះដែលអាចចាប់ផ្តើមចរចាកិច្ចព្រមព្រៀងមុនជាមួយក្លិបផ្សេងចាប់ពីថ្ងៃទី១ខែមករា បានបដិសេធសំណើក្លិប Chelsea ចំនួន១៤០,០០០ផោនក្នុងមួយសប្តាហ៍ ហើយត្រូវបានគេជឿថា ចង់បានជិត២០០,០០០ផោនក្នុងមួយសប្តាហ៍។ កីឡាករអន្តរជាតិអាឡឺម៉ង់ដែលរកបានប្រហែល៩០,០០០ផោនក្នុងមួយសប្តាហ៍រូបនេះបានស្ថិតក្នុងទម្រង់លេងដ៏អស្ចារ្យក្នុងរដូវកាលនេះ ហើយជឿជាក់ថា គាត់គួរតែស្ថិតក្នុងកម្រិតស្រដៀងគ្នាទៅនឹងកីឡាកររកចំណូលបានច្រើនជាងគេរបស់ក្លិប។
មិនមានការបែកបាក់នៅក្នុងទំនាក់ទំនងរបស់ Rudiger ជាមួយ Chelsea ទេ ដោយភាគីទាំង២បានយល់ថា ស្ថានភាពនេះមានភាពស្និទ្ធស្នាល ប៉ុន្តែក្លិបនៅតែស្ទាក់ស្ទើរក្នុងការត្រឡប់មកវិញជាមួយនឹងការផ្តល់ជូនដែលប្រសើរជាងនេះ។ កត្តានេះហើយបើកទ្វារឲ្យក្លិប Real Madrid ដែលកំពុងនាំមុខការប្រជែងដើម្បីចុះហត្ថលេខាលើខ្សែការពារកណ្តាលរូបនេះ។ ជាមួយគ្នានោះក្លិប Paris Saint-Germain និង Bayern Munich ក៏ចាប់អារម្មណ៍លើ Rudiger ដែរ ប៉ុន្តែការពិភាក្សាជាមួយ Real Madrid ត្រូវបានគេយល់ថា មានភាពល្អជាងគេក្នុងការប្រជែង។
សូមបញ្ជាក់ថា ខ្សែការពារ Rudiger គឺជាកីឡាករសំខាន់មួយនៅក្នុងក្លិបChelsea ដោយបានជួយឲ្យក្រុមទទួលបានជ័យជម្នះ ៣-២ កាលពីថ្ងៃសៅរ៍លើក្រុម Leeds។ ភាពទាក់ទាញរបស់គាត់ចំពោះក្លិប RealMadrid បានធ្វើឲ្យរូបគាត់ឈានមុខគេក្នុងការព្រមព្រៀងក្នុងការដេញថ្លៃសម្រាប់ខ្សែការពារដ៏ល្អបំផុតមួយនៅក្នុងពិភពបាល់ទាត់ ហើយមានឆន្ទៈក្នុងការបំពេញតាមការទាមទាររបស់គាត់ ៕
ដោយ៖ ភារៈ(រូបភាព ៖ theguardian.com)
