សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធសញ្ជាតិបារាំង និងជាប្រធានក្រុម Karim Benzema ស៊ុតបញ្ចូលទីបាន២គ្រាប់ ជួយឲ្យក្រុមអធិរាជស Real Madrid យកឈ្នះក្រុមម្ចាស់ផ្ទះ Athletic Bilbao ២ទល់១ ដើម្បីវ៉ាដាច់ឈ្នះ៨ពិន្ទុនៅលើកំពូលតារាង La Liga ដែលនឹងឈានចូលសម្រាករដូវរងា។
គ្រាប់បាល់បញ្ចូលទីយ៉ាងលឿនរបស់ Benzema បានជួយឲ្យ Real Madird នាំមុខ ២-០ បន្ទាប់ពីលេងបានតែ៧នាទីប៉ុណ្ណោះដើម្បីឈានទៅរកគ្រាប់បាល់បញ្ចូលទីចំនួន២០គ្រាប់សម្រាប់រដូវកាលនេះ។ គ្រាប់បាល់ទី១រកបាននៅនាទីទី៤ ពីការបញ្ជូនបាល់របស់ខ្សែបម្រើសញ្ជាតិអាល្លឺម៉ង់ Tony Kroos និងគ្រាប់បាល់ទី២រកបាននៅនាទីទី៧។
ចំណែកក្រុមម្ចាស់ផ្ទះ Athletic Bilbao រកបាន១គ្រាប់សងវិញដែរនៅតង់ទី១ដូចគ្នាដោយកីឡាករ Oihan Sancet នៅនាទីទី១០ ហើយលទ្ធផល២ទល់១នេះបានបន្តរហូតដល់ចប់ការប្រកួត។ កីឡាករ NicoWilliams មានឱកាសផងដែរដើម្បីតាមស្មើឲ្យ Bilbao នៅតង់ទីពីរ ប៉ុន្តែអ្នកចាំទី Thibaut Courtois ធ្វើការសង្គ្រោះបានល្អ។
ជ័យជម្នះរបស់ក្រុម Real Madrid នេះមានន័យថា ក្រុមរបស់លោក Carlo Ancelotti ឈានទៅរកការសម្រាកបុណ្យណូអែលក្នុងតំណែងលេចធ្លោមួយនៅលើកំពូលតារាង La Liga ទោះបីជាពួកគេបានកំពុងតាមពីក្រោយដោយក្រុមលេខ២ Sevilla ដែលនៅជិតបំផុតក៏ដោយ។ ក្រុម Real Madrid បានចាញ់តែ២ដងប៉ុណ្ណោះក្នុង២៥ប្រកួតក្នុងការប្រកួតទាំងអស់នៅរដូវកាលនេះ ដោយបរាជ័យចុងក្រោយរបស់ពួកគេនឹងប៉ះ Espanyol កាលពីថ្ងៃទី៣ ខែតុលា។
បច្ចុប្បន្ន Real Madrid ឈរលេខ១ក្នុងតារាងលីគកំពូលអេស្ប៉ាញ La Liga ដោយមាន៤៦ពិន្ទុក្នុង១៩ប្រកួត ខណៈក្រុមលេខ២ Sevillaមាន៣៨ពិន្ទុ ក្នុង១៨ប្រកួត។ ចំណែកក្រុមកំពុងឈរលេខ៣គឺ Real Batisមាន៣៣ពិន្ទុ, ក្រុមលេខ៤ Rayo Vallecano មាន៣០ពិន្ទុ រីឯ AtleticoMadrid ឈរលេខ៥មាន២៩ពិន្ទុ, Real Sociedad ឈរលេខ៦មាន២៩ពិន្ទុដែរ ហើយ Barcelona បានធ្លាក់មកឈរចំណាត់ថ្នាក់លេខ៧ មាន២៨ពិន្ទុ ក្នុង១៨ប្រកួតដូចគ្នា ៕
ដោយ៖ ភារៈ(រូបភាព ៖ BBC Sport)
