សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ យោងតាមសេចក្តីរាការណ៍បានឲ្យដឹងថាសមត្ថកិច្ចបញ្ជូន ជនសង្ស័យចំនួន០២នាក់ដែលជិះសុទ្ធតែរថយន្តស៊េរីទំនើបដើរធ្វើសកម្មភាពកាច់សោលួចយកម៉ូតូយ៉ាងសកម្មនៅក្នុងខេត្តបាត់ដំបង ហើយត្រូវសមត្ថកិច្ចចាប់ខ្លួនបាននិងត្រូវកសាងសំណុំរឿងបញ្ជូនទៅកាន់តុលាការ នៅព្រឹកថ្ងៃទី ២៤ ធ្នូ នេះហើយ ជាមួយនឹងវត្ថុតាងនានាផង។
ប្រធានការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបានឲ្យដឹងថា ជនសង្ស័យទាំង០២នាក់នេះ ម្នាក់ឈ្មោះ លី សុខឡេង ហៅពៅ ផល្លា ហៅម៉ាប់ អាយុ៣៩ឆ្នាំ គ្មានផ្ទះសម្បែងពិតប្រាកដទេ និងម្នាក់ទៀតឈ្មោះ ប៉ាល់ ស៊ីនឿន ហៅ គ្រឿត ព្រឹង ហៅ ស្វិត អាយុ៥០ឆ្នាំ រស់នៅភូមិពុកឆ្មា ឃុំអន្លង់វិល ស្រុកសង្កែ។
លោក ឈឿង គឹមសុង នាយការិយាល័យព្រហ្មទណ្ឌកំរិតស្រាល បាននិយាយថា ជនសង្ស័យទាំង០២នាក់នេះ ត្រូវបានឃាត់ខ្លួនជាបន្តបន្ទាប់ ក្រោយប្រព្រឹត្តអំពើចោរកម្មលើកចុងក្រោយនៅស្រុកសង្កែ។
លោកបន្តថាដោយមានកិច្ចសហការពីកម្លាំងការិយាល័យព្រហ្មទណ្ឌកំរិតធ្ងន់ ដែលដឹកនាំដោយលោក វ៉ាន់ តារា នាយរងការិយាល័យនិងកម្លាំងអធិការស្រុកសង្កែផង។
បើតាមសម្តីជនសង្ស័យឈ្មោះ លី សុខឡេង ហៅម៉ាប់ នេះ ត្រូវបានឃាត់ខ្លួននៅព្រឹកថ្ងៃទី២១ ធ្នូ នៅចំណុចភូមិអណ្ដូងត្រាច ឃុំកំពង់ព្រះ ស្រុកសង្កែ ពេលកំពុងប្រព្រឹត្តបទល្មើសជាក់ស្ដែង ។ ក្រោយពីសួរនាំរហូតកំណត់បាននូវមុខសញ្ញាបក្សពួកក្រុមចោរនេះ ទើបនៅព្រឹកថ្ងៃទី២២ ធ្នូ កម្លាំងជំនាញទទួលបទបញ្ជាពីលោកស្នងការខេត្ត និង តំណាងអយ្យការឲ្យតាមចាប់ខ្លួនបក្សពួកជននេះបានម្នាក់ទៀត ឈ្មោះ ប៉ាល់ ស៊ីនឿន ហៅ ស្វិត ដល់ទឹកដីខេត្តពោធិ៍សាត់ ដោយមានកិច្ចសហការពីកម្លាំងមូលដ្ឋានផងដែរ៕
ដោយ៖ អរុណរះ
