សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ នៅពេលស្រាមិនទាន់ចូលទៅក្នុងពោះធ្វើឲ្យមនុស្សមានការអាណិតស្រលាញ់គ្នាដូចចាក់ទឹកមិនលិច។
ប៉ុន្តែខណៈស្រាចូលពេញខ្លួនលែងដឹងអ្វីទាំងអស់ជាក់ស្តែង បុរសម្នាក់ត្រូវកម្លាំងនគរបានមូលដ្ឋានឃាត់ខ្លួនភ្លាមៗ ក្រោយជននេះប្រើពូថៅកាប់ទៅលើបងធម៌ពេលកំពុងផឹកស៊ីជាច្រើនពូថៅបណ្ដាលឱ្យរងរបួសធ្ងន់ ។
ករណីហិង្សាខាងលើនេះកើតឡើងកាលពីវេលាម៉ោង១០ព្រឹកថ្ងៃទី២៥ខែធ្នូ២០២១នៅចំណុចភូមិដំណាក់បេង ឃុំបួរ ស្រុកភ្នំព្រឹក។
បេីតាមនាយប៉ុស្ដិ៍នគរបាលបួរ លោក បូ បុល បានឲ្យដឹងថា ជនដៃដល់ឈ្មោះ ណែត វីរ: ភេទប្រុសអាយុ២៧ឆ្នាំ មុខរបធ្វើចម្ការស្នាក់ជាមួយជនរងគ្រោះឈ្មោះ ង៉ែត និត ហៅ នោង ភេទប្រុសអាយុ៤០ឆ្នាំ នៅកន្លែងកើតហេតុ ដែលត្រូវជាបងប្អូនធម៌នឹងគ្នា។
លោកនាយប៉ុស្តិ៍បានបញ្ជាក់ថា ជនដៃដល់បានប្រើប្រាស់ពូថៅកាប់.ទៅលើផ្ទៃមុខជនរងគ្រោះជាច្រើនពូថៅបណ្ដាលឲ្យរបួសធ្ងន់ ហើយត្រូវបានក្រុមគ្រួសារបញ្ជូនទៅកាន់មន្ទីរពេទ្យ រីឯជនដៃដល់ក៏ត្រូវកម្លាំងរបស់លោកចុះអន្តរាគមន៍ឃាត់ខ្លួនភ្លាមៗផងដែរ។
លោកបានបន្ថែមថា បើតាមការបំភ្លឺបឋមនៅកន្លែងកើតហេតុ អំពើហិង្សាដ៏កំរោលរវាងបងប្អូនធម៌នេះបានផ្ដើមចេញពីការប៉ះទង្កិចសំដីគ្នាពេលកំពុងផឹកស៊ី។ បើតាមសាក្សីនៅទីនោះបាននិយាយថា មុនកើតហេតុគេឃើញមនុស្សមួយក្រុមផឹកស៊ីជុំគ្នា តែបន្តិចក្រោយមកក៏ឮឈ្លោះគ្នារវាងបងប្អូនធម៌២នាក់ខាងលើយ៉ាងតឹងសរសៃ.ក តែមិនដឹងរឿងអ្វីនោះទេ។
សាក្សីបានបន្តថា ពេលឈ្លោះគ្នានោះគេឃើញ ជនរងគ្រោះកំពុងដេកលើអង្រឹងក្បែរគ្រែផឹក ស្រាបតែរំពេចនោះគេឃើញប្អូនធម៌ទាញពូថៅកាប់គ្មានប្រណីដៃ ជាច្រើនពូថៅលើផ្ទៃមុខបងធម៌នៅលើអង្រឹងបណ្ដាលឲ្យសន្លប់ឈាមជោគដីបង្កឲ្យភ្ញាក់ផ្អើលពេញវង់ផឹកស៊ី។
លោកមេប៉ុស្ដិ៍បួរ លោក បូ បុល បាននិយាយដែរថា បើតាមប្រវត្តិជនដៃដល់នេះ តែងមានចរិតកាចសាហាវពេលស្រវឹងម្ដងៗជននេះធ្លាប់ទៅរស់នៅស្រុកថៃ ច្រើនឆ្នាំហើយ លុះត្រឡប់មកស្រុកវិញ ទើបបានប្រហែល២ខែ ក៏បង្កឲ្យមានហិង្សាយ៉ាងធ្ងន់ធ្ងរជាមួយបងធម៌។
លោកបានបញ្ជាក់ថា ពេលនេះជនសង្ស័យត្រូវនគរបាលរបស់លោកឃាត់ខ្លួនកសាងសំណុំរឿងចាត់ការតាមនីតិវិវិធីនិងបញ្ជូនបន្តទៅអធិការដ្ឋាននគរបាលស្រុក៕
ដោយ៖អរុណរះ
