សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តហុីយ៉ាន់ដាយដឹកខ្សាច់ធុនធំមកកៀររថយន្តToyota Prius ដែលកំពុងឈប់ភ្លើងស្តុបបណ្ដាលឱ្យរងការខូចខាតយ៉ាងដំណំ តែមិនធ្វេីឱ្យមនុស្សរងរបួសនោះឡេីយ ។
ហេតុការណ៍នេះបានកេីតឡេីងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី២៦ ខែធ្នូ ឆ្នាំ២០២១ ស្ថិតនៅចំណុចភ្លើងស្តុបទីតាំងលក់រថយន្តមែរសឺដេស តាមបណ្ដោយផ្លូវ៦០ម៉ែត្រ ក្នុងសង្កាត់ចាក់អង្រែក្រោម ខណ្ឌមានជ័យ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគឺមានបុរសម្នាក់រួមដំណេីរដោយបុរស២នាក់ទៀតបើករថយន្តម៉ាកToyota Prius ពណ៌ទឹកប្រាក់ ពាក់ស្លាកលេខភ្នំពេញ 2AU-1490 តាមបណ្ដោយផ្លូវ៦០ម៉ែត្រ ពីត្បូងទៅជេីងក្នុងល្បឿនលឿនល្មម ខណៈមកដល់កន្លែងកេីតហេតុគាប់ជួនភ្លើងស្តុបពណ៌ក្រហមក៏ឈប់រថយន្ត ស្របពេលនោះក៏មានរថយន្តហុីយ៉ាន់ដាយដឹកខ្សាច់ធុនធំ ពណ៌ទឹកប្រាក់ ពាក់ស្លាកលេខ កំពង់ចាម 3B-0221ដែលធ្វេីដំណេីរស្របទិសគ្នាមកអែបខាងឆ្វេងរថយន្តPriusហេីយបត់ស្ដាំធ្វើឱ្យកៀររថយន្តPrius រងការខូចខាតទ្វារមួយចំហៀងយ៉ាងដំណំ តែមិនធ្វេីឱ្យមនុស្សណាម្នាក់រងរបួសនោះឡេីយ ។
ក្រោយកើតហេតុ ភាគីទាំងសងខាងបានចុះមកចរចាគ្នាមួយជំហានដោយជជែកយកត្រូវរៀងៗខ្លួន ទេីបពួកគាត់សម្រេចប្រគល់ឱ្យសមត្ថកិច្ចជំនាញធ្វេីការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមច្បាប់ ៕
ដោយ ៖ ភារ៉ា ដង្កោ
