សារព័ត៌មាន នគរវត្ត តែងតែនាំមុខគេជានិច្ច
អនាគតរបស់ខ្សែប្រយុទ្ធ Kylian Mbappe នៅក្រុម Paris Saint-Germain អាចត្រូវបានសម្រេចចិត្តបន្ទាប់ពីក្រុមរបស់គាត់ត្រូវប៉ះក្រុម Real Madrid ក្នុងក្របខ័ណ្ឌ Champions League នៅឆ្នាំក្រោយ។ នេះបើយោងតាមរបាយការណ៍ដែលក្លិបយក្ស La Liga នៅតែស្ថិតក្នុងជំហរចុះហត្ថលេខាលើកីឡាកររូបនេះ។
ទោះបីជាបច្ចុប្បន្ន Mbappe កំពុងលេងនៅឯកីឡដ្ឋាន Parc des Princes ក៏ដោយ ក៏អនាគតរយៈពេលវែងរបស់គាត់ហាក់ដូចជានៅឆ្ងាយពីក្លិប ដោយ Real Madrid បានអះអាងថា កំពុងមានទំនុកចិត្តនឹងអាចចាប់យកគាត់ដោយផ្ទេរមកអេស្ប៉ាញនៅរដូវកាលក្រោយ ។
ការចាប់ឆ្នោតវគ្គ១៦ក្រុមចុងក្រោយសម្រាប់ការប្រកួតក្លិបដ៏សំខាន់បានធ្វើឱ្យក្រុម PSG និង Madrid ប៉ះគ្នា ដោយបានអះអាងថា គ្មានការសម្រេចចិត្តណាមួយនឹងត្រូវធ្វើឡើងលើការផ្លាស់ប្តូរបន្ទាប់របស់ខ្សែប្រយុទ្ធរូបនេះរហូតដល់ចុងបញ្ចប់នៃការប្រកួត។ Mbappe នឹងអាចចុះហត្ថលេខាលើកិច្ចសន្យាមុនជាមួយក្លិបបរទេសចាប់ពីថ្ងៃទី១ ខែមករា ប៉ុន្តែជាមួយនឹងការប្រកួតរវាងក្រុមទាំងពីរដែលធ្វើឡើងនៅពាក់កណ្តាលខែកុម្ភៈ និងដើមខែមីនា គ្មានអ្វីនឹងត្រូវចុះហត្ថលេខារហូតដល់ពេលនោះទេ។
Real Madrid មានជំនឿចិត្តថា Mbappe ចង់ចូលរួមជាមួយពួកគេ ហើយការរក្សាកីឡាកររូបនេះនៅ PSG នឹងមិនអាចកើតឡើងបានទេ។ ជាការពិតណាស់ប្រធានក្លិប PSG លោក Nasser Al-Khelaifi និងនាយកកីឡា លោក Leonardo ត្រូវបានពិពណ៌នាថា មានអារម្មណ៍ទុទិដ្ឋិនិយមចំពោះការរក្សាកីឡាកររបស់ពួកគេ ដោយចង់បន្តកិច្ចសន្យា ប៉ុន្តែការពិភាក្សាលើលក្ខខណ្ឌថ្មីៗបានជាប់គាំង និងត្រូវបានលុបចោលវិញដោយមិនទាន់ចរចាទៀតនៅឡើយទេ។
ទោះជាយ៉ាងណាក៏ដោយ ក្រុម PSG បានបង្ហាញការព្រួយបារម្ភតិចតួចចំពោះភាពមិនច្បាស់លាស់នៃកិច្ចសន្យារបស់ Mbappe បន្ទាប់ពីពួកគេបានថតរូបជាមួយមិត្តរួមក្រុមជាមួយនឹងអាវដែលសរសេរថា “Mbappe2050” នៅថ្ងៃខួបកំណើតទី២៣របស់គាត់។ខ្សែការពារ Juan Bernatបានចែករំលែករូបភាពនេះនៅលើ Instagram របស់គាត់ដោយមានដូចជា Sergio Ramos, Ander Herrera, Achraf Hakimi និង GeorginioWijnaldum មានវត្តមានទាំងអស់។
ទន្ទឹមនឹងនេះដែរ លោក Leonardo បានទទូចនាពេលថ្មីៗនេះថា ក្លិបនៅតែមាន “លទ្ធភាពល្អ” ដើម្បីបន្តកិច្ចព្រមព្រៀងរបស់ Mbappe ។ គាត់បាននិយាយថា “វាជាស្ថានភាពដ៏ពិសេសមួយ ពីព្រោះយើងកំពុងនិយាយអំពីកីឡាករល្អបំផុតក្នុងពិភពលោកដែលនឹងឈានដល់ការបញ្ចប់កិច្ចសន្យារបស់គាត់។ យើងអាចនិយាយបានថា មានពេលខ្លះដែលយើងពិភាក្សាគ្នាយ៉ាងកក់ក្ដៅ ប៉ុន្តែនោះជាផ្នែកមួយនៃការកសាងទំនាក់ទំនង”។
សូមបញ្ជាក់ថា ខ្សែប្រយុទ្ធសញ្ជាតិបារាំង Kylian Mbappe មានវ័យ២៣ឆ្នាំ កំពុងលេងឲ្យក្លិងរបស់លីគកំពូលបារាំង PSG ដែលក្លិបនេះបានខ្ចីជើង១រដូវកាល (២០១៧-២០១៨) ពីក្លិប Monaco ហើយបានទិញផ្តាច់នៅចុងឆ្នាំ២០១៨។ នៅ PSG កីឡាកររូបនេះរកបាន១០០គ្រាប់ក្នុងការបង្ហាញខ្លួន១២៤ប្រកួត។ កីឡាកររូបនេះបានជួយឲ្យបារាំងឈ្នះ World Cup ឆ្នាំ២០១៨ផងដែរ ដោយបានបង្ហាញខ្លួន៥៣ដង រកបាន២៤គ្រាប់ឲ្យក្រុមជម្រើសជាតិរបស់គាត់ ៕
ដោយ៖ ភារៈ(រូបភាព ៖ dailymail.com)
