សារព័ត៌មាន នគរវត្ត តែងតែនាំមុខគេជានិច្ច
ឥណ្ឌូនេសុី៖ បុរសជនជាតិឥណ្ឌូនេស៊ីម្នាក់បានបង្ហោះវីដេអូសារភាពថា ខ្លួនបានចាក់វ៉ាក់សាំងបង្ការកូវីដ-១៩ រហូតដល់ទៅ១៤ដូសជំនួសអ្នកខ្លាចម្ជុលដើម្បីទទួលបានប្រាក់។
លោក Abdul Rahim រស់នៅក្នុងរដ្ឋ Pingrang លើកោះ Sulawesi ប្រទេសឥណ្ឌូនេស៊ីបានបង្ហោះឃ្លីបវីដេអូនៅលើបណ្តាញសង្គមថា គាត់បានទៅចាក់វ៉ាក់សាំងដល់ទៅ១៤ដូសនូវវ៉ាក់សាំងស៊ីណូវ៉ាក់ ជំនួសមនុស្សជាច្រើននាក់ ដែលខ្លាចម្ជុលមិនហ៊ានទៅចាក់។
លោក Abdul Rahim បានឱ្យដឹងថា ការទៅចាក់វ៉ាក់សាំងជំនួសគេ គឺទទួលបានប្រាក់ពី ១០០ពាន់ដល់ ៨០០ពាន់ រូព្យ៉ាស់(rupiah) (ប្រមាណ៧-៥៦ដុល្លារអាមេរិក)។ ចំពោះផ្ទាល់ខ្លួនលោក Abdul Rahim ក៏បានចាក់វ៉ាក់សាំងរួចរាល់២ដូសផងដែរ សរុបក្នុងខ្លួនលោកចាក់វ៉ាក់សាំងបានដល់ទៅ១៦ដូស។
មន្ត្រីប៉ូលិសក្នុងតំបន់ និងក្រសួងសុខាភិបាលឥណ្ឌូនេស៊ីបានចាប់ផ្តើមបើកការស្រាវជ្រាវករណីខាងលើ ហើយអាចនឹងចោទប្រកាន់ទោសលោក Rahim តាមច្បាប់ស្តីពីជំងឺឆ្លង។ តាមច្បាប់អ្នកដែលរារាំងសកម្មភាពគ្រប់គ្រងជំងឺឆ្លងអាចនឹងត្រូវពិន័យជាប្រាក់ឬជាប់គុក រហូតដល់ទៅ១ឆ្នាំ។
មនុស្សដែលជួលលោក Rahim ទៅចាក់វ៉ាក់សាំងជំនួសគឺត្រូវបានឃាត់ខ្លួន ហើយបង្ខំឱ្យទៅចាក់វ៉ាក់សាំង។ មនុស្ស៣នាក់បានសារភាពជាមួយប៉ូលិសថា ខ្លួនខ្លាចម្ជុលទើបជួលលោក Rahim ឲ្យទៅចាក់ជំនួស។
មកទល់ពេលនេះឥណ្ឌូនេស៊ីមានករណីឆ្លងកូវីដ-១៩ សរុបជាង ៤,២លាននាក់ និងស្លាប់ ជាង១៤៤ពាន់នាក់ ៕ ដោយ៖ធីរីណា
រូបថត៖TTXVN.VNA
