សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ នាព្រឹកថ្ងៃទី២៩ ខែធ្នូ ឆ្នាំ២០២១នេះ បានចាត់ឱ្យលោក ជិន ប៊ុនធឿន នាយកប្រតិបត្តិសាខា ដឹកនាំមន្ត្រីប្រតិបត្តិសាខា និងយុវជនកាកបាទក្រហមកម្ពុជា ចំនួន៣២នាក់ ចូលរួមពិធីដង្ហែសពលោកឧកញ៉ា ថៃ សេងឡុង សមាជិកគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ដែលបានទទួលមរណភាពកាលពីវេលាម៉ោង៦និង៣០នាទីល្ងាចថ្ងៃ អាទិត្យទី២៦ ខែធ្នូ ឆ្នាំ២០២១ ក្នុងជន្មាយុ៨៦ឆ្នាំ ដោយជរាពាធ ពីគេហដ្ឋានតម្កល់សពផ្ទះលេខ៥៤-៥៦ ផ្លូវលេខ២០០ សង្កាត់បឹងរាំង ខណ្ឌដូនពេញ ឆ្ពោះទៅកាន់វត្តច័ន្ទបុរីវង្ស ស្ថិតក្នុងខណ្ឌព្រែកព្នៅ ដើម្បីប្រារព្ធធ្វើពិធីបញ្ចុះសព ។
មរណភាពរបស់លោកឧកញ៉ា ថៃ សេងឡង គឺជាការបាត់បង់ជីតា ឪពុក ប្រកបដោយ គុណធម៌ ព្រហ្មវិហារធម៌ ជាពិសេសជាការបាត់បង់ថ្នាក់ដឹកនាំដ៏សកម្មមួយរូបរបស់សាខារាជធានី ដែលបានលះបង់ពេលវេលា កម្លាំងកាយចិត្ត ប្រាជ្ញា ស្មារតី ធនធានផ្ទាល់ខ្លួនដោយសទ្ធាជ្រះថ្លា ដើម្បីបុព្វហេតុមនុស្សធម៌ ជួយដល់ជនរងគ្រោះ និងអ្នកងាយរងគ្រោះដោយប្រការផ្សេងៗ ។
ទន្ទឹមនឹងនេះ ក្នុងនាមលោក ឃួង ស្រេង ប្រធានគណៈកម្មាធិការសាខា ថ្នាក់ដឹកនាំ មន្ត្រីប្រតិបត្តិសាខា អនុសាខា អ្នកស្មគ្រ័ចិត្ត យុវជនកាកបាទក្រហមទាំងអស់ លោកនាយកប្រតិបត្តិសាខា សូមឧទ្ទិសបួងសួងជូនចំពោះវិញ្ញាណក្ខន្ធសពលោកឧកញ៉ា ថៃ សេងឡុង បានទៅកាន់សុគតិភពកុំបីឃ្លៀងឃ្លាតឡើយ ៕
ដោយ៖ស តារា
