សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងតាមរបាយការណ៍របស់ ក្រសួងដែនដីនគរូបនីយកម្ម និងសំណង់ នៅព្រឹកថ្ងៃទី៣០ ខែធ្នូ ឆ្នាំ២០២១នេះ បានឱ្យដឹងថា ការវិនិយោគក្នុងវិស័យសំណង់ទូទាំងប្រទេសនៅឆ្នាំ២០២១នេះ មានចំនួន ៤៣០៣គម្រោង មានផ្ទៃក្រឡាកម្រាលសំណង់សរុប ១២,៩៩៨,០៧២ម៉ែត្រការ៉េ ដែលមានតម្លៃប៉ាន់ស្មានទុនវិនិយោគ ៥,៣៣៣,៧៩៨,៥២៥ដុល្លារអាមេរិក បេីទោះបីជាកម្ពុជាកំពុងប្រឈមនឹងការរីករាលដាលជំងឺកូវីដ-១៩ក៏ដោយ។
ទោះជាយ៉ាងនេះក្តី ទុនវិនិយោគលើវិស័យសំណង់ទូទាំងប្រទេសនៅឆ្នាំ២០២១ បានថយចុះប្រមាណ ៣១,២១% បើធៀបនឹងឆ្នាំ២០២០ កន្លងទៅ។
នៅក្នុងរបាយការណ៍ក្រសួងរៀបចំដែនដី បានគូសបញ្ជាក់ជារួមដូចខាងក្រោម៖
* សម្រាប់សមត្ថកិច្ចក្រសួងរៀបចំដែនដី គឺមានចំនួន៣៨៨គម្រោង ផ្ទៃក្រឡាកម្រាលសំណង់ចំនួន១០,៤២០,២៩៣ម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ៤,២១៨,៩១០,១២៧ដុល្លារ បើធៀបនឹងឆ្នាំ២០២០ ថយចុះ ៣៦,៥៧%
* ដោយឡែកសមត្ថកិច្ចរដ្ឋបាលរាជធានី-ខេត្ត គឺមានចំនួន៣ ៩១៥គម្រោង មានផ្ទៃក្រឡាកម្រាលសំណង់ចំនួន ២,៥៧៧,៧៨០ម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ១,១១៤,៨៨៨,៣៩៨ដុល្លារ បើធៀបនឹងឆ្នាំ២០២០ កើនឡើង១,១៧%។
របាយការណ៍របស់ក្រសួង បានបញ្ជាក់បន្ថែមទៀតថា៖ គិតពីចាប់ផ្តើមអនុវត្តឆ្នាំ២០០០ ដល់ដំណាច់ឆ្នាំ២០២១ កម្ពុជាបានចេញលិខិតអនុញ្ញាតសាងសង់នៅទូទាំងប្រទេសចំនួន ៥៧ ៥៩០គម្រោង ផ្ទៃក្រឡាកម្រាលសំណង់សរុបចំនួន ១៦៦,៦២៣,៨៩១ម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ៦៦, ២០៥,៨៤១,៩៣៦ ដុល្លារផងដែរ។
គួរបញ្ជាក់ថា គិតពីឆ្នាំ២០០៥ មកដល់ឆ្នាំ២០២១នេះ សំណង់អគារខ្ពស់ៗចាប់ពី៥ជាន់ឡើងទៅកើនឡើងរហូតជាង ២៣៧៥ អគារ ដែលក្នុងនោះសំណង់អគារខ្ពស់ៗ នៅខេត្តព្រះសីហនុ មានចំនួនជាង ៦៦៦អគារ៕
ដោយ៖ស តារា
