សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ មានការភ្ញាក់ផើ្អលមួយក្នុងចង្កោមអ្នកសិល្បៈក្រោយពីគេបានឃើញការបង្ហោះសារអមទៅដោយរូបភាពនៃគ្រោះថ្នាក់ចរាចរណ៍របស់តារាកំប្លែងជើងចាស់ តាចេក នៅតាមបណ្តោយផ្លូវ ដោយការក្រឡាប់ម៉ូតូកង់បីរហូតរងរបួសខ្លួនឯង និងចៅៗ២នាក់ផ្សេងទៀត។ នេះបើយោងតាមការបញ្ចាក់របស់តារាកំប្លែងមាឌធំ នាយធុង ដែលបានបង្ហោះសារអមដោយរូបភាពកាលពីមុននេះបន្តិច។
នាយធុងបានបញ្ជាក់ថា”ព្រះអើយជួយឪចេកបើកដឹកបន្លែផ្លែឈើទៅលក់នៅគីរីរម្យព្រឹកមិញបណ្ដាលឱ្យក្រឡាប់របួសបែកក្បាលរួមទាំងចៅពីរនាក់ទៀតសូមបងប្អូនសប្បុរសជនជួយគាត់ផងហេតុតែជីវភាព ខ្វះខាត។
ភ្ជាប់ដោយសំណេរនេះគឺជាលេខទូរស័ព្ទដៃរបស់តារាកំប្លែងតាចេកគឺលេខ012704372 និងលេខ081 72 21 44 ។ ទោះជាយ៉ាងណាមិនអាចស្វែងរកការបញ្ជាក់ពីតារាកំប្លែងរូបនេះបាននៅឡើយទេនៅពេលនេះដោយសារទំនាក់ទំនងចូលប៉ុន្តែសេវារអាក់រអួលស្តាប់ពុំបាន។ មានទស្សនិកជនជាច្រើនបានបង្ហាញក្តីអាណិតជាខ្លាំងទៅកាន់តារាកំប្លែងរូបនេះក្រោយពីជួបហេតុការណ៍គ្រោះថ្នាក់ខាងលើដោយអ្នកខ្លះលើកឡើងថាពិតជាកម្សត់ ជីវិតរបស់សិល្បករដែលមានជីវភាពខ្វះខាតនោះ។
ទោះជាយ៉ាងណាកន្លែងកើតហេតុត្រូវបានគេសង្ស័យថាជាផ្លូវទៅកាន់តំបនើរមនីយដ្ឋានគីរីរម្យដែលជាទីកន្លែងតារាកំប្លែងរូបនេះបានធ្វើដំណើរទៅលក់បន្លែផ្លែឈើជាច្រើនខែកន្លងមកហើយពោលគឺក្រោយពីការងារសិល្បៈស្ងប់ស្ងាត់ព្រោះជំងឺកូវីដ១៩កន្លងទៅនោះ។ កន្លងទៅតាចេកក៏ទទួលបានការជួយពីសំណាក់សប្បុរសជនខ្លះប៉ុន្តែតារាកំប្លែងរូបនេះអះអាងថានៅតែទទួលយកការជួយពីសប្បុរសជន និងមិនលើកដៃសុំលុយពីគេឡើយពោលគឺប្រឹងប្រែងឲ្យអស់ពីលទ្ធភាពដើម្បីចិញ្ចឹមជីវិត និងស្នើឲ្យម្ចាស់កម្មវិធីនានាផ្តល់ឱកាសសម្រាប់ការបង្ហាញសមត្ថភាពសិល្បៈដើម្បីរកប្រាក់កម្រៃជួយដល់ជីវភាពផងដែរ៕
ដោយ ៖ វឌ្ឍនា
