សារព័ត៌មាន នគរវត្ត តែងតែនាំមុខគេជានិច្ច
ក្លិបហង្សក្រហម Liverpool បានដាក់សំណើជាផ្លូវការដើម្បីពន្យារពេលការប្រកួត League Cup ឬ Carabao Cup វគ្គពាក់កណ្តាលផ្តាច់ព្រ័ត្រជើងទីមួយក្នុងទឹកដីក្រុមកាំភ្លើងធំ Arsenal នៅរាត្រីថ្ងៃព្រហស្បតិ៍នេះដោយសារការកើនឡើងនៃករណីឆ្លងជំងឺ Covid-19 នៅក្នុងក្លិប។ជាមួយគ្នានេះក្រុមហង្សក្រហមបានលុបចោលការហ្វឹកហាត់ជាក្រុមដំបូងកាលពីថ្ងៃអង្គារផងដែរ។
គ្រូបង្វឹកក្រុមហង្សក្រហម Liverpool លោក Jurgen Klopp បានខកខានការដឹកនាំក្រុមក្នុងការប្រកួតក្របខ័ណ្ឌ Premier League កាលពីថ្ងៃអាទិត្យក្នុងទឹកដី Chelsea បន្ទាប់ពីការធ្វើតេស្តវិជ្ជមាន Covid-19។ចំណែកកីឡាករ Alisson, Joel Matip និង Roberto Firmino ក៏ខកខានការប្រកួតនេះផងដែរ ខណៈដែលសមាជិកបុគ្គលិក៣នាក់បានធ្វើតេស្តវិជ្ជមាន។
ក្រុមហង្សក្រហមត្រូវបានបាត់បង់កីឡាករបន្ថែមទៀតដោយការចាកចេញរបស់ Mohamed Salah, Sadio Mane និង Naby Keita សម្រាប់ការប្រកួត Africa Cup of Nations ។
សំណើនេះត្រូវបានធ្វើឡើងទៅកាន់លីគបាល់ទាត់អង់គ្លេស (EFL) ជាមួយនឹងការប្រកួតនៅកីឡដ្ឋាន Emirates ដែលគ្រោងនឹងធ្វើឡើងនៅវេលាម៉ោង២និង៤៥នាទីរំលងអធ្រាត្រឈានថ្ងៃសុក្រ។
សេចក្តីថ្លែងការណ៍របស់ Liverpool បានសរសេរថា “ក្នុងចំណោមការពិចារណាដែលនាំទៅដល់ការដាក់ពាក្យស្នើសុំ EFL នាពេលបច្ចុប្បន្ននេះ គឺតម្រូវការសម្រាប់អ្នកគាំទ្រក្នុងការធ្វើដំណើរត្រូវបានផ្តល់ការជូនដំណឹងឱ្យបានច្រើនតាមដែលអាចធ្វើទៅបានអំពីការពន្យារពេលដែលមានសក្តានុពលណាមួយ។ ដោយមិនមានការរំពឹងទុកនៃស្ថានភាពបច្ចុប្បន្នប្រសើរឡើងមុនការប្រកួតនៅថ្ងៃព្រហស្បតិ៍ និងស្ថានភាពកាន់តែអាក្រក់នោះ ក្លិបចាត់ទុកជាការប្រុងប្រយ័ត្ន និងសមហេតុផលក្នុងការស្នើសុំឱ្យរៀបចំការប្រកួតឡើងវិញ។ Liverpool នឹងផ្តល់ការធ្វើបច្ចុប្បន្នភាពបន្ថែមលើដំណើរការដាក់ពាក្យសុំ ក៏ដូចជាការបន្តការហ្វឹកហាត់ឡើងវិញក្នុងពេលកំណត់”។
អ្នកនាំពាក្យរបស់ EFL បាននិយាយថា សំណើរបស់ Liverpool ឥឡូវនេះនឹងត្រូវបានពិចារណាដោយអនុលោមតាមច្បាប់នៃការប្រកួតដែលបានកំណត់នៅដើមរដូវកាលនេះរួមជាមួយនឹងព័ត៌មានដែលដាក់ជូនដោយក្លិប។ EFL បានបន្ថែមថា យើងនឹងស្វែងរកការបញ្ជាក់ពីទីតាំងរបស់ League ឱ្យបានឆាប់តាមដែលអាចធ្វើទៅបាន នៅពេលដែលកាលៈទេសៈត្រូវបានពិនិត្យយ៉ាងពេញលេញ។
Liverpool នឹងត្រូវធ្វើជាម្ចាស់ផ្ទះទទួលក្រុម Shrewsbury Town ក្នុងការប្រកួត FA Cup ជុំទី៣ នៅថ្ងៃអាទិត្យ មុនពេលប្រកួតជើងទី២ទល់នឹងក្រុម Arsenal នៅផ្ទះនៅថ្ងៃទី១៣ ខែមករា។
ការធ្វើតេស្តចុងក្រោយបង្អស់នៃក្របខ័ណ្ឌ Premier League បានបង្ហាញពីការថយចុះនៃការឆ្លង Covid-19 ពីមួយសប្តាហ៍ទៅមួយសប្តាហ៍ដំបូងក្នុងរយៈពេល៨សប្តាហ៍ចុងក្រោយនេះ។
មានករណីថ្មីចំនួន៩៤ក្នុងចំណោមកីឡាករ និងបុគ្គលិក Premier League ពីការធ្វើតេស្តសរុបចំនួន១៤,២៥០នាក់ក្នុងរយៈពេល៧ថ្ងៃរហូតដល់ថ្ងៃទី២ខែមករា ពោលគឺធ្លាក់ចុះពីកំណត់ត្រាចំនួន១០៣ករណី ។
សូមបញ្ជាក់ថា ការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ League Cup នឹងធ្វើឡើងចំនួន២ជើង ដោយការប្រកួតជើងទី១គឺក្រុម Chelsea ធ្វើជាម្ចាស់ផ្ទះទទួលក្រុម Tottenham ខណៈដែលក្រុមម្ចាស់ផ្ទះកាំភ្លើងធំ Arsenal ត្រូវប៉ះក្រុមហង្សក្រហម Liverpool នៅថ្ងៃព្រហស្បតិ៍ ៕
ដោយ៖ ភារៈ(រូបភាព ៖ BBC Sport)
