សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៍មានពីអគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានឱ្យដឹងនៅថ្ងៃសុក្រទី០៧ ខែមករា ឆ្នាំ២០២២នេះថា៖ មន្ត្រីជំនាញ បាននាំយករថយន្តពិសោធន៍ចល័តចុះត្រួតពិនិត្យទំនិញតាមបណ្ដាផ្សារ ពិធីតាំងពិពណ៌ផលិតផល និងហាងលក់ទំនិញនានាស្ថិតក្នុងខេត្តតាកែវ, ខេត្តកែប, ខេត្តសៀមរាប, កំពង់ធំ និងខេត្តព្រះសីហនុនៅថ្ងៃទី៦ ខែមករា ឆ្នាំ២០២២នេះ។ បន្ទាប់ពីបានធ្វេីការត្រួតពិនិត្យ មន្ត្រីជំនាញពុំបានរកឃេីញទំនិញមិនអនុលោមដាក់ចរាចរនៅលេីទីផ្សារឡេីយ។
ជាក់ស្ដែងលទ្ធផល បានឆ្លុះបញ្ចាំងនូវកិច្ចខិតខំប្រឹងប្រែងរបស់មន្ត្រីក.ប.ប. ដែលបានចុះអនុវត្តច្បាប់កន្លងមកនេះ។
ជាមួយគ្នានោះ មន្ត្រីក.ប.ប. បានបន្តចុះត្រួតពិនិត្យអនុលោមភាពលេីស្ថានីយ និងដេប៉ូលក់ប្រេងឥន្ធនៈចំនួន ១៦ទីតាំងក្នុងភូមិសាស្ត្រខេត្តសៀមរាប ខេត្តស្វាយរៀង ខេត្តកំពង់ធំ និងរាជធានីភ្នំពេញនៅថ្ងៃទី៦ ខែមករា ឆ្នាំ២០២២នេះ។
ក្នុងប្រតិបត្តិការនេះផងដែរ មន្ត្រីជំនាញបានរកឃេីញដេប៉ូលក់ប្រេងឥន្ធនៈចំនួន ៩ទីតាំងដែលមិនអនុលោមតាមច្បាប់។ បន្ទាប់ពីបានរកឃេីញដូច្នេះ មន្ត្រីជំនាញបានធ្វេីការពិន័យអន្តរការណ៍ និងណែនាំដល់ម្ចាស់ដេប៉ូទាំងនោះដេីម្បីកែសម្រួល៕
ដោយ៖ស តារា
