សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ មនុស្សចំនួន ៥នាក់ ក្រោយកម្លាំងសមត្ថកិច្ចឃាត់ខ្លួនពាក់ព័ន្ធការញុះញង់ឱ្យប្រជាពលរដ្ឋ តវ៉ាទាមទារដី នៅតំបន់៣ ស្ថិតនៅស្រុកកំពង់លែង ខេត្តកំពង់ឆ្នាំង និងប្រឆាំងទៅនឹង អនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជានោះ ត្រូវបានចៅក្រមសាលាដំបូងខេត្តកំពង់ឆ្នាំង នៅថ្ងៃទី៩ ខែមករា ឆ្នាំ២០២២នេះ បានសម្រេចឃុំខ្លួនជាបណ្ដោះអាសន្នហើយ។
ជាក់ស្ដែងសមត្ថកិច្ចជំនាញខេត្តកំពង់ឆ្នាំង កាលពីថ្ងៃទី៨ ខែមករាម្សិលមិញនេះ បានបញ្ជូនខ្លួនមនុស្សចំនួន ៥នាក់ខាងលេីនេះ ទៅសាលាដំបូងខេត្តកំពង់ឆ្នាំង ដេីម្បីចាត់ការតាមច្បាប់ ពីបទញុះញង់អោយប្រព្រឹត្តបទឧក្រិដ្ឋជាអាទិ៍ និងដឹកជញ្ជូនអាវុធខុសច្បាប់។
សូមរម្លឹកថា យោងតាមរបាយការណ៍របស់ស្នងការដ្ឋាននគរបាលខេត្តកំពង់ឆ្នាំង បានឱ្យដឹងថា កាលពីថ្ងៃទី៦ ខែមករា ឆ្នាំ២០២២ បានឃាត់ខ្លួនជនសង្ស័យទាំង៥នាក់ នៅចំណុចទំនប់អូរត្រាវ និងទំនប់ខ្នាយទោល ស្ថិតនៅក្នុងភូមិគុយ និងភូមិប្រាសាទ ឃុំដារ ស្រុកកំពង់លែង ខេត្តកំពង់ឆ្នាំង។ ដោយជនសង្ស័យទី ១. ឈ្មោះ សាំង ចាន់ថន ហៅសាំង សុង ភេទប្រុស អាយុ ៤៦ឆ្នាំ រស់នៅទីក្រុងភ្នំពេញ , ទី២. ឈ្មោះ អុក ប៉ារ៉ាឌី ភេទប្រុស អាយុ ៣៣ឆ្នាំ រស់នៅទីក្រុងភ្នំពេញ , ទី៣. ឈ្មោះ ប្រាក់ សង្ហា ភេទប្រុស អាយុ ២៣ ឆ្នាំរស់នៅទីក្រុងភ្នំពេញ មានតួនាទី ជាតៃកុងឡាន ,ទី៤. ឈ្មោះ គង់ តារា ភេទប្រុស អាយុ ៥៦ឆ្នាំ រស់នៅភូមិពាមទន្លា ឃុំពោធិ៍ ស្រុកកំពង់លែង ខេត្តកំពង់ឆ្នាំង ,និងទី៥. ឈ្មោះ កែវ ហួរ (ឃុំខ្លួននៅថ្ងៃទី៨ ខែមករា ឆ្នាំ២០២២) ។
ដោយឡែកវត្ថុតាងចាប់យករួមមាន៖ រថយន្តមួយគ្រឿង ម៉ាក Lexus Lx450 ពណ៌ទឹកប្រាក់ ស្លាកលេខ ភ្នំពេញ 2Q 7993 ទូរស័ព្ទចំនួន ៨ គ្រឿង laptop មួយគ្រឿង អាវុធខ្លីមួយដើមម៉ាក ប៉ារ៉ា ផលិតនៅ ប្រទេសកូរ៉េ គ្រាប់ចំនួន ១២ គ្រាប់ ។
បច្ចុប្បន្នជនជាប់ចោទទាំង៥នាក់នេះ ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារខេត្តជាបណ្ដោះអាសន្ន៕
ដោយ៖សហការី
