សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ ករណីពុលអាហារក្នុងពិធីជប់លៀងរបស់ក្រុមហ៊ុនផលិតទឹកបរិសុទ្ធយីហោ” ម៉ាកប្រូវីដា” មានមនុស្សប្រុសស្រីជាង ៣០នាក់ ត្រូវបានដឹកយកទៅសង្គ្រោះនៅមន្ទីរបង្អែកខេត្តកំពត និងគ្លីនិកឯកជនផ្សេងៗទៀត។ ប៉ុន្តែរហូតដល់រសៀលថ្ងៃទី២២ ខែមករា ម្សិលមិញនេះ ជនរងគ្រោះទាំងអស់បានជាសះស្បើយ ព្រមទាំងចាកចេញពីមន្ទីរពេទ្យ និងគ្លីនិកវិញហើយ។ នេះបេីយោងតាមប្រភពព័ត៌មានពីសមត្ថកិច្ចមូលដ្ឋាន។
យោងតាមរបាយការណ៍របស់សមត្ថកិច្ចនគរបាលស្រុកឈូក បានឱ្យដឹងថា កាលពីម៉ោង ៦ល្ងាចថ្ងៃទី២១ ខែមករា ឆ្នាំ២០២២ថ្មីៗនេះ មានករណីពុលអារហារ ក្នុងពិធីជប់លៀងមួយរបស់ក្រុមហ៊ុន ផលិតទឹកបរិសុទ្ធយីហោ”ម៉ាកប្រូវីដា” ស្ថិតក្នុងភូមិស្នំប្រាំពីរ ឃុំមាក់ប្រាង ស្រុកទឹកឈូក ខេត្តកំពត បណ្តាលឱ្យមនុស្សប្រុសស្រី ៣៤នាក់ ត្រូវបញ្ជូនចូលសង្គ្រោះបន្ទាន់។
របាយការណ៍ដដែល បន្តថា ភ្លាមៗក្នុងចំណោមនោះជនរងគ្រោះ ២៦នាក់ ត្រូវបានដឹកបញ្ជូនទៅសង្គ្រោះនៅមន្ទីរបង្អែកខេត្តកំពត។ ចំណែកជនរងគ្រោះចំនួន ៨នាក់ផ្សេងទៀត ត្រូវបានដឹកទៅព្យាបាលនៅគ្លីនិកឯកជន។
បច្ចុប្បន្នសមត្ថកិច្ចចម្រុះកំពុងធ្វើការស្រាវជ្រាវរកមូលហេតុ នៃការពុលអាហារនេះផងដែរ ប៉ុន្តែជំហានដំបូងសង្ស័យថាមកពីការលាងបន្លែមិនស្អាតល្អ ទេីបបណ្ដាលឱ្យពុលបែបនេះ៕
ដោយ៖សហការី
