សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ការទុកដាក់សំរាមនៅតែជាបញ្ហា ខណៈដែលអាជ្ញាធរខណ្ឌចំការមន បានណែនាំដល់ពលរដ្ឋបញ្ចេញសំរាមឱ្យត្រូវតាមម៉ោងពេលកំណត់ ។ នេះជាការបញ្ជាក់របស់លោក ថេង សុថុល អភិបាលខណ្ឌ និងប្រធានអនុសាខាកាកបាទក្រហមកម្ពុជាខណ្ឌចំការមន ក្នុងពិធីចែកអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈលោកឃួង ស្រេង ប្រធានសាខាកាកបាទក្រហមកម្ពុជារាជធានីភ្នំពេញ ជូនដល់ប្រជាពលរដ្ខដែលមានជីវភាពខ្វះខាត និងជនចាស់ជរាក្នុងសង្កាត់ទួលទំពូងទី២ចំនួន ៥០គ្រួសារ នៅព្រឹកថ្ងៃសៅរ៍ ទី២៩ ខែមករា ឆ្នាំ២០២២។
លោកអភិបាលខណ្ឌបានលើកឡើងពីបញ្ហាទុកដាក់សំរាមដែលបងប្អូនប្រជាពលរដ្ឋមួយចំនួននៅមិនទានមានការយល់ដឹងពីការបញ្ចេញសំរាមឱ្យបានត្រឹមត្រូវតាមពេលវេលា ខណៈក្រុមហ៊ុនប្រមូលសំរាមបច្ចុប្បន្នដែលមាន៣ក្រុមហ៊ុនកំពុងអនុវត្តការងារប្រមូលសំរាមក្នុងរាជធានីភ្នំពេញបានល្អប្រសើរហើយនោះ។ ជាមួយគ្នានេះ លោកអភិបាលខណ្ឌក៏បានជំរុញដល់អាជ្ញាធរសង្កាត់បន្តអប់រំនិងណែនាំដល់បងប្អូនប្រជាពលរដ្ឋឱ្យពួកគាត់បានយល់ដឹងពីការបញ្ចេញសំរាមនេះ ។
លោកប្រធានគណៈកម្មាធិការអនុសាខា ក៏បានអំពាវនាវដល់ប្រជាពលរដ្ឋទាំងអស់ បង្កេីនការប្រុងប្រយត្ន័ដោយបន្តអនុវត្តឲ្យបានខ្ជាប់ខ្ជួននូវវិធានការ ៣ការពារ និង៣កុំ ដេីម្បីចូលរួមទប់ស្កាត់ការរីករាលដាលជំងឺកូវីដ-១៩ ។
ជាមួយនឹងការផ្សព្វផ្សាយឱ្យការពារពីជំងឺឆ្លងកូវីដ-១៩ហើយនោះ លោក ថេង សុថុល ក៏បានអំពាវនាវដល់ប្រជាពលរដ្ឋទាំងអស់ប្រុងប្រយ័ត្នចំពោះគ្រោះអគ្គិភ័យ ដែលអាចកើតឡើងបណ្ដាលមកពីភ្លើងចង្ក្រាន ធូប ទៀន ក៏ដូចជាបញ្ហាអគ្គិសនី ដោយធ្វើយ៉ាងណាពិនិត្យឱ្យបានម៉ត់ចត់ កុំមានការធ្វេសប្រហែសឱ្យសោះ ជាពិសេស នៅថ្ងៃសែនបុណ្យចូលឆ្នាំប្រពៃណីចិន-វៀតណាម ខាងមុខនេះ ។
សូមជម្រាបថា អំណោយដែលចែកជូននាពេលនេះរួមមាន៖ អង្ករ, មី, ទឹកត្រី, ទឹកស៊ីអ៉ីវ, ម៉ាស់ និងថវិកាមួយចំនួន ៕
ដោយ៖ ជីណា
