សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ នៅព្រឹកថ្ងៃទី០៧ ខែកុម្ភៈ ឆ្នាំ២០២២ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេស អមដំណើរដោយក្រុមការងារក្រសួងសុខាភិបាល បានអញ្ជើញចុះពិនិត្យមើលដំណើរការចាក់វ៉ាក់សាំងកូវីដ-១៩ ចំនួន២ទីតាំងបន្ថែមទៀតដែលស្ថិតនៅក្នុងខេត្តត្បូងឃ្មុំ ។
សូមបញ្ជាក់ថា ទីតាំងដែលលោកស្រីឱ វណ្ណឌីន ចុះពិនិត្យមើលនោះរួមមាន៖
១-ការិយាល័យសុខាភិបាលស្រុកប្រតិបត្តិអូររាំងឪ
២-មណ្ឌលសុខភាព ជប់ ។
សូមជម្រាបជូនថា ក្នុងឱកាសនោះលោកស្រីវេជ្ជបណ្ឌិតបានបន្តក្រើនរំលឹកទៅដល់ប្រជាពលរដ្ឋត្រូវតែរួសរាន់ទៅទទួលយកនូវការចាក់វ៉ាក់សាំងឱ្យបានគ្រប់ៗគ្នានៅតាមទីតាំងនិងមូលដ្ឋានសុខាភិបាលតែម្ដង។ មួយវិញទៀតលោកស្រីវេជ្ជបណ្ឌិត ឱ វណ្ណឌីន បានជម្រាបជូនដល់ប្រជាពលរដ្ឋពីជំងឺកូវីដ-១៩ ជាពិសេសវីរុសបំប្លែងថ្មី អូមីក្រុង ដែលកំពុងរីករាលដាលនៅបណ្តាប្រទេសនានាក្នុងពិភពលោកក៏ដូចនៅក្នុងប្រទេសកម្ពុជាផងដែរ។ លោកស្រីបានបន្តផ្តាំផ្ញើឱ្យប្រជាពលរដ្ឋចូលរួមថែរក្សាអនាម័យឱ្យបានគ្រប់ៗគ្នា ក៏ដូចជាអនុវត្តពាក្យស្លោក «៣កុំ ៣ការពារ» បូករួមជាមួយការចាក់វ៉ាក់សាំងឱ្យបានគ្រប់ចំនួនដូសផងដែរ។
ចំពោះកំណេីនអត្រាចាក់វ៉ាក់សាំងកូវីដ-១៩នៅកម្ពុជា គិតត្រឹមថ្ងៃទី០៦ ខែកុម្ភៈ ឆ្នាំ២០២២៖
-លើប្រជាជនអាយុពី១៨ឆ្នាំឡើងមាន ១០២,០៧% ធៀបជាមួយចំនួនប្រជាជនគោលដៅ១០លាននាក់។
-លើកុមារ-យុវវ័យអាយុពី១២ឆ្នាំទៅក្រោម១៨ឆ្នាំ មាន៩៩,៥៨% ធៀបជាមួយចំនួនប្រជាជនគោលដៅ១,៨២៧,៣៤៨ នាក់។
-លើកុមារអាយុពី០៦ឆ្នាំដល់ក្រោម ១២ឆ្នាំ មាន១០៦,០២% ធៀបជាមួយនឹងប្រជាជនគោលដៅ ១,៨៩៧,៣៨២នាក់។
-លើកុមារអាយុ៥ឆ្នាំ មាន១០៦,៧៣% ធៀបជាមួយនឹងប្រជាជនគោលដៅ ៣០៤,៣១៧ នាក់។
-លទ្ធផលចាក់វ៉ាក់សាំងធៀបនឹងចំនួនប្រជាជនសរុប១៦លាននាក់ មាន ៨៩,៧៧% ៕
ដោយ ៖ សិលា
