សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តford ranger មួយគ្រឿងប្រដេញរថយន្តមួយគ្រឿងទៀតដែលបានបុករថយន្តប្អូនរបស់ខ្លួនមិនឈប់ដោះស្រាយ ក៏បានបុកជាមួយរថភ្លើងបើកឆ្លងផ្លូវពេញទំហឹងបណ្ដាលឲ្យរងការខូចខាតយ៉ាងដំណំ សំណាងល្អមិនបង្កឲ្យមានអ្នករងរបួស។
ហេតុការណ៍នេះកើតឡើងកាលពីវេលាម៉ោង១០ យប់ថ្ងៃទី ២៨ ខែកុម្ភៈឆ្នាំ ២០២២ នៅតាមបណ្ដោយផ្លូវជាតិលេខ៤ កែងនិងផ្លូវរថភ្លើង ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យរាជធានីភ្នំពេញ។
តាមការរៀបរាប់ពីតៃកុងរថយន្តford ranger ពណ៌សពាក់ស្លាកលេខសៀមរាប2C-4536 បានប្រាប់ឲ្យដឹងថាមុនកើតហេតុ មានរថយន្តមួយគ្រឿងមិនស្គាល់ម៉ាកបានបើកបុករថយន្តរបស់ប្អូនគាត់ នៅចំណុចផ្លូវកប់ស្រូវ ភ្លាមនោះរថយន្តបង្កមិនបានឈប់ធ្វើការដោះស្រាយនោះទេ បានព្យាយាមបើករត់ ខណៈនោះរូបគាត់និងប្អូនគាត់ក៏បានបើករត់ដេញពីក្រោយដោយធ្វើដំណើរទិសដៅពីកើតទៅលិច លុះមកដល់ចំណុចកើតហេតុខាងលើ រថយន្តប្អូនគាត់ក៏បានបើកទៅមុនផុត ខណៈនោះរូបគាត់ក៏ខំបើករថយន្តឆ្លងកាត់ផ្លូវរថភ្លើងឲ្យផុតដែរ តែរថភ្លើងបានមកដល់ល្មម វាក់អើជ្រុលបុកគ្នាពេញទំហឹងបណ្ដាលឲ្យរថយន្តរបស់គាត់រងការខូចខាតផ្នែកខាងមុខយ៉ាងដំណំសំណាងល្អរូបគាត់មិនមានរងរបួស។តាមការបញ្ជាក់ពីបុរសម្នាក់ជាអ្នកមើលការខុសត្រូវដាក់បារាសនិងដកបារាសផ្លូវរថភ្លើងបានប្រាប់ឲ្យដឹងថា មានគេទាក់ទងតាមវិទ្យុទាក់ទងប្រាប់ថារថភ្លើងបានឆ្លងកាត់នៅកន្លែងកើតហេតុឥឡូវហើយ រូបគាត់ក៏ប្រញាប់ប្រញាលទាញបារាសបិទដើម្បីជាសញ្ញាថារថភ្លើងឆ្លងកាត់ តែរថយន្តខាងលើនៅតែបើកបំពានធ្លងកាត់ផ្លូវដែកទើបជួបគ្រោះថ្នាក់ចរាចរណ៍បែបនេះទៅ។
ក្រោយកើតហេតុភ្លាមៗម្ចាស់រថយន្តបានសូមយករថយន្តទៅជួសជុលដោយខ្លួនឯង តែខាងតំណាងភាគីខាងរថភ្លើង មិនឲ្យយកទៅណានោះទេ ទុកធ្វើការដោះស្រាយគ្នាសិន បើដោះស្រាយគ្នាមិនត្រូវ ទើបប្រគល់ជូនសមត្ថកិច្ចយកទៅរក្សាទុករង់ចាំធ្វើការដោះស្រាយគ្នាបន្តទៀត៕
ដោយ៖សុខាសែនជ័យ
