សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ បេីយោងតាមប្រភពព័ត៌មានពីស្នងការដ្ឋាននគរបាលខេត្តព្រះសីហនុ បានឱ្យដឹងនៅរសៀលថ្ងៃសុក្រទី២៧ ខែឧសភា ឆ្នាំ២០២២នេះថា៖ កម្លាំងនគរបាលជំនាញស្រុកព្រៃនប់ បានធ្វេីការស្រាវជ្រាវ រហូតឈានដល់ការឃាត់ខ្លួន ក្រោយធ្វើសកម្មភាពលួចបានសម្រេចរួចគេចខ្លួនជិតមួយសប្ដាហ៍។
យោងតាមរបាយការណ៍របស់ស្នងការដ្ឋាននគរបាលខេត្ត បានឱ្យដឹងថា កម្លាំងជំនាញអធិការនគរដ្ឋាននគរបាលស្រុកព្រៃនប់ កាលពីថ្ងៃទី២១ ខែឧសភា ឆ្នាំ២០២២ថ្មីៗនេះ បានទទួលព័ត៌មានពីការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកោះកុង សុំកិច្ចសហការ ជួយស្វែងរកមុខសញ្ញាលួចម៉ូតូពីស្រុកបទុមសាគរខេត្តកោះកុង មកសំងំលាក់ខ្លួនក្នុងមូលដ្ឋានស្រុកព្រៃនប់។ បន្ទាប់ពីទទួលបានព័ត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឱ្យកម្លាំងជំនាញនៃអធិការដ្ឋាននគរបាលស្រុកព្រៃនប់ ធ្វើការសហការជាមួយប៉ុស្ដិ៍នគរបាលរដ្ឋបាលបឹងតាព្រហ្មនិងប៉ុស្ដិ៍នគរបាល រដ្ឋបាលអូរឧកញ៉ាហេង ធ្វើការស្រាវជ្រាវរហូតដល់ថ្ងៃទី២៦ ខែឧសភា ឆ្នាំ២០២២ វេលាម៉ោង២០និង៣០នាទីយប់ យើងបានធ្វើការឃាត់ខ្លួនជនសង្ស័យ០១នាក់ឈ្មោះ ឈាង ពី ភេទប្រុស អាយុ ២២ឆ្នាំ មុខរបរមិនពិតប្រាកដ មានទីលំនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងដកហូតវត្ថុតាងរួមមាន ម៉ូតូ១គ្រឿងម៉ាក Honda DreamC125 ពណ៌ខ្មៅ សេរីឆ្នាំ២០១៩ ពាក់ផ្លាកលេខ កោះកុង1B-4954 ។
បច្ចុប្បន្នកម្លាំងជំនាញ បានប្រគល់ជនសង្ស័យ និងវត្តុតាងឱ្យទៅនគរបាលស្រុកបរទុមសាគរនៃស្នងការដ្ឋាននគរបាលខេត្តកោះកុងដើម្បីអនុវត្តនីតិវិធីច្បាប់បន្ត ៕
ដោយ៖សហការី
