សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅថ្ងៃទី២៣ ខែមិថុនា ឆ្នាំ២០២២៖ ធុងបែងចែកសំរាមចំនួន ១០០ធុង ដែលប្រើប្រាស់ក្នុងព្រឹត្តិការណ៍ដំណើរទេសចរណ៍ពានបាល់ទាត់ពិភពលោក “FIFA WORLD CUP™ TROPHY TOUR” នាំមកជូនដោយក្រុមហ៊ុនឯកជន ត្រូវបានប្រគល់ជូនជាផ្លូវការហើយ សម្រាប់ប្រើប្រាស់ក្នុងពហុកីឡដ្ឋានជាតិមរតកតេជោ ក្រោមអធិបតីភាពលោក ជា បូរ៉ា រដ្ឋលេខាធិការក្រសួងទេសចរណ៍។
ធុងសំរាមទាំងនេះត្រូវបានដាក់ឱ្យប្រើប្រាស់ក្នុងព្រឹត្តិការណ៍ដំណើរទេសចរណ៍ពានបាល់ទាត់ពិភពលោក “FIFA WORLD CUP™ TROPHY TOUR” នៅពហុកីឡដ្ឋានជាតិមរតកតេជោ ក្នុងគោលបំណងលើកទឹកចិត្តប្រជាពលរដ្ឋ អ្នកស្នេហាវិស័យកីឡាឱ្យយល់ដឹងអំពីអត្ថប្រយោជន៍ក្នុងការបែងចែកសំរាមទៅតាមប្រភេទ។ ប្រភេទធុងសំរាមទាំងនេះរួមមាន ធុងសម្រាប់ដាក់សំរាមដែលអាចកែច្នៃឡើងវិញ (Recyclable Waste) មានដូចជាកំប៉ុងអាលុយមីញូម ដបប្លាស្ទិក និងធុងសម្រាប់ដាក់កាកសំណល់អាហារជាដើម។
ក្រុមហ៊ុនឯកជនមួយនេះ សង្ឃឹមថា តាមរយៈការផ្តល់ធុងបែងចែកសំរាមទៅតាមប្រភេទបែបនេះ គឺជាគំនិតផ្តួចផ្តើមដែលនឹងលើកកម្ពស់សក្តានុពលនៃសេដ្ឋកិច្ចវិលជុំ ដោយការលើកកម្ពស់ការកែច្នៃឡើងវិញ និងការប្រើប្រាស់ឡើងវិញនូវដបប្លាស្ទិក។
ពិធីប្រគល់ធុងសំរាមជាផ្លូវការនេះ ធ្វើឡើងក្រោមអធិបតីភាពរបស់លោក ជា បូរ៉ា រដ្ឋលេខាធិការក្រសួងទេសចរណ៍ និងកញ្ញា សម្បត្តិ មុនីវរលក្ខណ៍ នាយកផ្នែកទំនាក់ទំនងកិច្ចការសាធារណៈ និងចីរភាពប្រចាំប្រទេសរបស់ក្រុមហ៊ុនឯកជនមួយនេះ។
លោក ជា បូរ៉ា បានមានប្រសាសន៍ថា៖ «នេះជាកិត្តិយសសម្រាប់ប្រទេសកម្ពុជា ដែលបានទទួល ដំណើរមកដល់ជាផ្លូវការរបស់ពានបាល់ទាត់ពិភពលោក ដែលជាផ្នែកមួយនៃព្រឹត្តិការណ៍ដំណើរ ទេសចរណ៍ពានបាល់ទាត់ពិភពលោក។ ហើយក៏ជាកិត្តិយសផងដែរ ក្នុងការទទួលបានធុងសំរាមទាំងនេះ ដែលបង្ហាញពីរបៀបដែលក្រុមហ៊ុនមួយនេះ កំពុងនាំមុខគេក្នុងការលើកកម្ពស់និរន្តរភាព និងគំនិតផ្តួចផ្តើម ផ្នែកបរិស្ថាន»។
សូមជម្រាបថា ព្រឹត្តិការណ៍ដំណើរទេសចរណ៍ពានបាល់ទាត់ពិភពលោកឆ្នាំ ២០២២នេះ ដែលនាំមកជូនដោយក្រុមហ៊ុនឯកជនមួយនេះ មានបេសកម្មគាំទ្រដល់ការអភិវឌ្ឍកិច្ចខិតខំប្រឹងប្រែងប្រកបដោយនិរន្តរភាពនៅក្នុងប្រទេសនីមួយៗដែលដំណើរ ទេសចរណ៍នេះបានទៅដល់។ នេះជាលើកដំបូងហើយ ដែលព្រឹត្តិការណ៍សម្រាប់អតិថិជននឹងត្រូវបានរៀបចំដោយប្រើប្រាស់ឌីជីថលច្រើន ហើយក្រុមហ៊ុន ក៏បានកាត់បន្ថយសំរាមនៅគ្រប់កន្លែងសំចតនៃព្រឹត្តិការណ៍ដំណើរទេសចរណ៍នេះ រីឯសម្ភារប្រើប្រាស់សម្រាប់ព្រឹត្តិការណ៍នីមួយៗ (Activation material) ត្រូវបានផលិតក្នុងស្រុក និងអាចកែច្នៃប្រើប្រាស់ឡើងវិញបាន ព្រមទាំងបានកាត់បន្ថយការប្រើប្រាស់ទឹក ថាមពល សម្ភារៈ រួមទាំងធនធានផ្សេងៗទៀតឱ្យនៅត្រឹមកម្រិតអប្បបរមា។
គូសបញ្ជាក់ផងដែរ ធុងសម្រាមចំនួន ១០០ធុង ដែលបានប្រគល់ជូនពហុកីឡដ្ឋានជាតិមរតកតេជោនេះ គឺជាធុងសំរាមដែលបានផលិតក្នុងប្រទេសកម្ពុជាផ្ទាល់តែម្តង៕
ដោយ៖សហការី
